თბილისი, 26 მარტი – Sputnik. საქართველოს საბანკო სისტემისთვის დოლარიზაცია ყველაზე დიდი რისკია, განაცხადა ეროვნული ბანკის პრეზიდენტმა კობა გვენეტაძემ.
2022 წლის თებერვლის მდგომარეობით, დეპოზიტებმა უცხოურ ვალუტაში მთლიანი დეპოზიტების 59,25% შეადგინა, უცხოურ ვალუტაში გაცემულმა სესხებმა - 49%. საშუალოდ, უცხოურ ვალუტაში დეპოზიტებისა და სესხების მოცულობა ერთ თვეში 1%-ით გაიზარდა.
„ლარიზაციის პოლიტიკამ ფინანსურ სისტემას საშუალება მისცა პანდემიის შოკისთვის კარგად გაეძლო... აქედან გამომდინარე, არამხოლოდ მე, არამედ სუვერენული სააგენტოები და საერთაშორისო ორგანიზაციები ვფიქრობთ, რომ დოლარიზაცია ყველაზე დიდი რისკია საქართველოს საბანკო სისტემისთვის“, - განაცხადა გვენეტაძემ.
ამასთან მან აღნიშნა, რომ ეროვნული ბანკი დედოლარიზაციის პოლიტიკას გააგრძელებს.
2016 წელს ეროვნულმა ბანკმა ქვეყნის ეკონომიკაში დოლარის მიმოქცევის მოცულობის შემცირების კომპლექსური პროგრამა დაიწყო. ღონისძიებებს შორისაა კომერციული ბანკების რეზერვების მიმართ შეცვლილი მოთხოვნები და უცხოურ ვალუტაში სესხების გაცემის შეზღუდვები.