პრინც ჰარისა და მეგან მარკლის არაოფიციალურმა ბიოგრაფმა ომიდ სკობიმ წყვილის პირადი ცხოვრებიდან დამატებითი დეტალები გაასაჯაროვა. ამჯერად საუბარია სატელეფონო ზარზე, რომელმაც ელისაბედ II-ის შვილიშვილი ძალიან შეაშინა.
2016 წელს ჰარი მეგანს სტუმრობდა კანადაში. იმ დროისათვის წყვილი უკვე ოთხი თვე იყო ერთად და სიგიჟემდე შეყვარებულები იყვნენ. მათ გადაწყვიტეს წასულიყვნენ „ჰელოუინის“ წვეულებაზე ტორონტოში. ორივემ ვენეციური ნიღბები გაიკეთა, რათა ვერავის ეცნო.
რაღაც მომენტში ჰარის დაურეკეს კენსინგტონის სასახლიდან და უთხრეს, რომ წყვილის გამჟღავნებას აპირებდნენ და მათი ურთიერთობის შესახებ სტატია გაზეთში დაიბეჭდებოდა. საიდუმლო საბოლოოდ გაირკვა, იუწყება The Sun-ი.
2017 წლის ნოემბერში ინგლისის სამეფო ოჯახმა ოფიციალურად განაცხადა, რომ ინგლისის პრინცი ჰარი მის ამერიკელ შეყვარებულზე, მსახიობ მეგან მარკლზე ქორწინდებოდა. განცხადებიდან რამდენიმე საათში მათი პირველი ინტერვიუ ერთდროულად რამდენიმე არხზე გავიდა, მათ შორის BBC-სა და CNN-ზე, სადაც წყვილი ნიშნობის დეტალებზე საუბრობდა.
„ტიპური, ჩვეულებრივი და მყუდრო საღამო იყო. ქათამს ვამზადებდით ვახშმისთვის და უცებ ასეთი სიურპრიზი მომიწყო, ძალიან საყვარლად, ბუნებრივად და რომანტიკულად გამოუვიდა. დაიჩოქა და მკითხა, გავხდებოდი თუ არა მისი ცოლი", – გაიხსენა მეგან მარკლმა.
ისტორიის მოყოლა კი ჰარიმ გააგრძელა: "წინადადების დასრულება არც კი დამაცადა, ინსტიქტურად მიპასუხა, რომ თანახმა იყო. შემდეგ ერთმანეთს ჩავეხუტეთ, მას თითზე ჩემი მიცემული ბეჭედი ეკეთა. მხოლოდ ჩვენ ორნი ვიყავით და ეს არაჩვეულებრივი იყო".