თბილისში უკრაინის მხარდამჭერი მიტინგი ანტისამთავრობო გამოსვლებში გადაიზარდა

თბილისი, 7 მარტი – Sputnik. თბილისის ცენტრში გამართულ აქციაზე რამდენიმე ადამიანი დააკავეს, იუწყება „Sputnik-საქართველოს“ კორესპონდენტი ადგილიდან.

დაკავებულებს შორის არიან აქტივისტები გიგა მაქარაშვილი, ნოდარ რუხაძე, ზუკა ბერძენიშვილი, ბაჩი ვალიშვილი. თბილისის საპატრულო პოლიციის უფროსის ლაშა ჯოხაძის ინფორმაციით, აქციის ყველა მონაწილე საზოგადოებრივი წესრიგის დარღვევისა და პოლიციისთვის წინააღმდეგობის გაწევის გამო დააკავეს.

თავდაპირველად აქცია უკრაინის მხარდასაჭერად მოეწყო. აქციის ორგანიზატორი – სამოქალაქო მოძრაობა „სირცხვილია“ და აქციაზე მოსული მოქალაქეები საქართველოს ხელისუფლებისგან რუსეთის მოქალაქეებისთვის სავიზო რეჟიმის შემოღებას, საქართველოში რუსული მედიის მუშაობის აკრძალვას და რუსული ავიაკომპანიებისთვის ცის დახურვას მოითხოვდნენ.

მონაწილეებმა რუსთაველის გამზირზე პარლამენტის შენობასთან უკრაინის დიდი დროშა გაშალეს და მსვლელობით მთავრობის ადმინისტრაციის შენობისკენ გაემართნენ.

მოგვიანებით აქცია ანტისამთავრობო გამოსვლებში გადაიზარდა. საბაბი გახდა მთავრობის გადაწყვეტილება, არ შეუერთდეს რუსეთის წინააღმდეგ ეკონომიკურ სანქციებს. აქციის მონაწილეები პრემიერ-მინისტრ ირაკლი ღარიბაშვილის გადადგომას მოითხოვდნენ და სკანდირებდნენ „წადი“.

სიტუაცია მაშინ გამწვავდა, როდესაც აქციის მონაწილეებმა პოლიციელებს ფქვილი შეაყარეს და ტუალეტის ქაღალდები ესროლეს – დაიწყო დაკავებები. დაკავებულია რამდენიმე ადამიანი.

რუსეთის პრეზიდენტმა ვლადიმირ პუტინმა, დონეცკისა და ლუგანსკის მოთხოვნის პასუხად, ეღიარებინა მათი სუვერენიტეტი, 21 თებერვალს ხელი მოაწერა შესაბამის ბრძანებულებებს, ხოლო 24 თებერვალს „სპეციალური სამხედრო ოპერაცია“ დაიწყო „უკრაინის დემილიტარიზაციისა და დენაციფიკაციის“ მიზნით.

ამის პასუხად დასავლეთის ქვეყნებმა ახალი მკაცრი სანქციები დაუწესეს რუსეთს. სანქციების სიაში მოხვდნენ ქვეყნის უმსხვილესი ბანკები, სახელმწიფო კომპანიები, უმაღლესი თანამდებობის პირები და ა.შ. ამასთან გერმანიამ „ჩრდილოეთი ნაკადი-2“-ის სერტიფიკაციის პროცესი შეაჩერა, მსოფლიოს მრავალმა ქვეყანამ რუსეთის თვითმფრინავებს ცა ჩაუკეტა, ქვეყნიდან გავიდა არაერთი მსოფლიო ბრენდი.