თბილისი, 25 თებერვალი − Sputnik. თურქეთს შეუძლია უკრაინის მოთხოვნით დახუროს ბოსფორისა და დარდანელის გასასვლელები სამხედრო ხომალდებისთვის, თუმცა ასეთ ვითარებაშიც კი რუსეთს ექნება შესაძლებლობა, გამოიყენოს სრუტეები ფლოტის ბაზაზე დასაბრუნებლად, განაცხადა თურქეთის საგარეო საქმეთა მინისტრმა მევლუთ ჩავუშოღლუმ.
„უკრაინამ ოფიციალური მოთხოვნა გამოგვიგზავნა. მონტრეს კონვენციის ნორმები [სრუტეების სტატუსის შესახებ] უკიდურესად ნათელია და ზუსტი. <...> თურქეთს შეუძლია შეზღუდოს სამხედრო ხომალდების გავლა სრუტეებში, მაგრამ მონტრეს კონვენცია ასევე ითვალისწინებს იმას, რომ ომში მონაწილე ქვეყნების ხომალდებს ბაზებზე დაბრუნება შეუძლიათ. და მათ ამის უფლება უნდა მიეცეთ“, − ციტირებს ჩავუშოღლუს თურქული გაზეთი Hurriyet.
გარდა ამისა, მინისტრმა ასევე აღნიშნა, რომ თურქეთი ეწინააღმდეგება რუსეთის სამხედრო მოქმედებებს და დონეცკისა და ლუგანსკის აღიარებას.
გუშინ, მას შემდეგ, რაც რუსეთმა დონბასში სამხედრო ოპერაცია წამოიწყო, ანკარაში უკრაინის ელჩმა ვასილი ბონდარმა თურქეთის ხელისუფლებას მიმართა თხოვნით, დახურონ რუსეთის ავიაციისა და საზღვაო ხომალდებისთვის თურქეთის საჰაერო სივრცე და ასევე დარდანელისა და ბოსფორის სრუტეები. გარდა ამისა, ელჩმა მოუწოდა ანკარას, შეუერთდეს ანტირუსულ სანქციებს.
წყარო: Hurriyet