თბილისი, 4 თებერვალი — Sputnik. სურსათის ეროვნულმა სააგენტომ თბილისში ნახევარ ტონამდე გაურკვეველი წარმომავლობის ხორცი გამოავლინა, ნათქვამია სააგენტოს მიერ გავრცელებულ ინფორმაციაში.
ხორცისა და ხორცპროდუქტების გადამამუშავებელი კუსტარულად მოწყობილი საწარმო, რომელიც სურსათის ეროვნული სააგენტოს გვერდის ავლით საქმიანობდა, სააგენტოს ინსპექტირების ჯგუფებმა ლილოს დასახლებაში გამოავლინეს.
საწარმოში ასევე დაფიქსირდა სანიტარიულ-ჰიგიენური ნორმების უხეში დარღვევა, კრიტიკული და არაკრიტიკული შეუსაბამობები, ეტიკეტირების წესის დარღვევა.
ბიზნეს-ოპერატორი ფუნქციონირებდა ეკონომიკურ საქმიანობათა რეესტრში რეგისტრაციის გარეშე.
„სახეობრივი კვლევის მიზნით (ცხენისა და ვირის იდენტიფიკაცია) აღებულია ნიმუშები, რომლებიც ლაბორატორიული კვლევისთვის გაიგზავნება აკრედიტებულ ლაბორატორიაში", – აღნიშნულია უწყების მიერ გავრცელებულ ინფორმაციაში.
ბიზნეს-ოპერატორი დაჯარიმდა და შეუჩერდა საწარმოო პროცესი.
უწყების ცნობით, დალუქული ხორცი განადგურდება სურსათის ეროვნული სააგენტოს ზედამხედველობით, კანონმდებლობის შესაბამისად.