თბილისი, 1 თებერვალი — Sputnik. ძალადობაში ბრალდებულმა ოპოზიციონერმა პოლიტიკოსმა, წარსულში თბილისის მერმა გიგი უგულავამ განაცხადა, რომ უკვე მზადაა დაიჯეროს, რომ ძიუდოისტი ბადრი გავაშელიშვილი სცემა.
თბილისის საქალაქო სასამართლოში სამშაბათს 2019 წლის დეკემბერში თბილისის აეროპორტში მომხდარ საქმეზე მოსმენა დაიწყო. უგულავას ბრალად ედება ევროპის ჩემპიონის ბადრი გავაშელიშვილის ცემა. უგულავასთან ერთად ბრალი წარდგენილი აქვს მეორე სპორტსმენს – დავით პარკაძეს, რომელსაც ბრალი ედება უგულავას თანმხლების, ასევე ოპოზიციონერი პოლიტიკოსის გიორგი გაბაშვილის ცემაში.
„ეს საქმე პოლიტიკური და სამართლებრივი აბსურდია და ამ რეჟიმის ცინიზმს კარგად წარმოაჩენს. მე და გოკა გაბაშვილს ყველაზე დაცულ ადგილზე თავს დაგვესხნენ, მერე აქეთ დამაბრალეს, რომ ვცემე და აგერ სასამართლოზე დავდივარ. პროკურატურაც თუ ირწმუნება, სასამართლოც თუ ამას იძახის, გავაშელიშვილიც მაგას წერს, ბოლოში მეც დავიჯერებ, რომ ვცემე, ეს, რა თქმა უნდა, ხუმრობით. მეტი რა ვქნა", – განუცხადა უგულავამ ჟურნალისტებს.
უგულავა სასამართლო პროცესს ესწრება. დღევანდელ მოსმენაზე დაგეგმილია ბრალდების მხარის ოთხი მოწმის დაკითხვა. მათ შორის არიან სასაზღვრო პატრული და გამომძიებელი.
კონფლიქტი საპასპორტო კონტროლის ზონაში მოხდა. უგულავამ და გაბაშვილმა, რომლებიც ვერ გაფრინდნენ ლარნაკაში, განაცხადეს, რომ მათ ორი უცნობი პირი დაესხა თავს.
მოწმეების დაკითხვის შედეგად გამოძიება მივიდა დასკვნამდე, რომ მსხვერპლი არიან გაბაშვილი და გავაშელიშვილი, ანუ ერთი მათგანი, ვისაც ოპოზიციონერებმა თავდასხმაში დასდეს ბრალი.
ბრალის დამტკიცების შემთხვევაში უგულავასა და მეორე ბრალდებულს ელოდებათ ჯარიმა ან საზოგადოებისთვის სასარგებლო შრომა 120-დან 180 საათამდე ვადით, ან შინაპატიმრობა ექვსი თვიდან ერთ წლამდე, ან ერთ წლამდე პატიმრობა.