თბილისი, 21 იანვარი– Sputnik. სოციალურ ქსელებში გავრცელებულ ინფორმაციას, რომლის მიხედვითაც გარკვეულ სამედიცინო დაწესებულებებში მოქალაქეებისგან სწრაფი ტესტის გაკეთებაში თანხის გადახდას ითხოვენ, ჯანდაცვის სამინისტრო გამოეხმაურა.
უწყებაში განმარტეს, რომ ანტიგენის სწრაფი ტესტით მოსახლეობის ტესტირება სახელმწიფო პროგრამებით ფინანსდება და მასში ჩართულმა დაწესებულებებმა პირის უფასო ტესტირება უნდა უზრუნველყონ.
იმ მოქალაქეებს, რომლებმაც სახელმწიფო პროგრამებში ჩართულ დაწესებულებებში სწრაფი ტესტის გაკეთებისთვის თანხა გადაიხადეს, შეუძლიათ დეტალური ინფორმაცია რეგულირების სააგენტოს მიაწოდონ.
„თუ სერვისში უკვე გადაიხადეთ თანხა, გთხოვთ, დეტალები მოგვწეროთ სამედიცინო და ფარმაცევტული საქმიანობის რეგულირების სააგენტოს მეილზე – regagency@moh.gov.ge. ასევე გთხოვთ, განცხადებას თან დაურთოთ გადახდის ქვითარი. სააგენტო აღნიშნულ შემთხვევაზე რეაგირებას მოახდენს მოქმედი კანონმდებლობის შესაბამისად“, – აცხადებენ სამინისტროში.
საქართველოში ახალი კორონავირუსით დაავადებულთა რაოდენობა ბოლო დღე-ღამის განმავლობაში 8.767-ით გაიზარდა.
ბოლო 24 საათში ჩატარებულია 56.386 კვლევა ტესტით. მათ შორის ანტიგენის სწრაფი ტესტით – 35.725, PCR–ტესტით – 20.661.