თბილისი, 21 იანვარი– Sputnik. აჭარაში საქართველოს ყოფილი პრემიერ-მინისტრის, გიორგი გახარიას პარტია „საქართველოსთვის“ დამფუძნებლებმა დატოვეს. 25 დამფუძნებლიდან გიორგი გახარიას გუნდიდან 14 ადამიანი წავიდა.
მათი განცხადებით, აჭარის ორგანიზაციის ხელმძღვანელი ირაკლი მიქელაძე, თვითმმართველობის არჩევნების მეორე ტურის წინ, პარტიასთან შეუთანხმებლად აწარმოებდა გარიგებას „ნაციონალურ მოძრაობასთან“.
კერძოდ, პარტიის ყოფილი წევრების განცხადებით, მეორე ტურში დახმარების სანაცვლოდ, მიქელაძე ითხოვდა, რომ აჭარის პარტიული ორგანიზაციის მოქმედი აღმასრულებელი მდივანი თამილა ფაღავა ბათუმის საკრებულოს აპარატის უფროსად დაენიშნათ, რაზეც ოპოზიციური კოალიციისგან უარი მიიღო.
ამის შემდეგ მიქელაძემ ოპოზიციურ ფლანგს დახმარების სანაცვლოდ ბათუმის ვიცე-მერობა მოსთხოვა, რაზეც თანხმობა მიიღო და მეორე ტურის წინ „ნაციონალური მოძრაობის“ კანდიდატის სასარგებლოდ დაიწყო ხმების შეგროვება.
„ყველა ვინც კი გუნდის შიგნით მიქელაძისგან განსხვავებულ პოზიციას აჟღერებდა, ამ უკანასკნელის მხრიდან დისკრიმინაციის მსხვერპლი ხდებოდა “, — განაცხადეს გახარიას გუნდის ყოფილმა წევრებმა.
მათი თქმით, რთული წინასაარჩევნო მარათონიდან გამომდინარე, არ სურდათ გუნდში განხეთქილების შეტანა და ამ ყველაფერზე დუმილს ამჯობინებდნენ, თუმცა მათივე აზრით, დუმილმა პროცესები კიდევ უფრო გააუარესა.
„ჩვენ არ გვსურს მუშაობა განვაგრძოთ ადამიანთან ერთად, რომელიც სპობს განსხვავებულ აზრს, შიდაპარტიულ დემოკრატიას ღიად ემუქრება და პარტიას მართავს არა ამომრჩეველთა ნების სასიკეთოდ, არამედ პირადი მოტივებითა და ანგარების მიღების მიზნით“, - განაცხადეს გახარიას პარტიის ყოფილმა წევრებმა.
თავად პარტიის თავმჯდომარეს, გიორგი გახარიას მომხდართან დაკავშირებით ამ დრომდე კომენტარი არ გაუკეთებია.
საქართველოს ცენტრალური საარჩევნო კომისიის მონაცემების თანახმად, გახარიას პარტია ადგილობრივ არჩევნებში, „ქართული ოცნებისა“ და „ნაცმოძრაობის“ შემდეგ, მესამე ადგილზე გავიდა.
გიორგი გახარიამ პრემიერ-მინისტრის პოსტი და მმართველი პარტია „ქართული ოცნება - დემოკრატიული საქართველო“ გასული წლის თებერვალში დატოვა.
ექს-პრემიერმა ოპოზიციური პოლიტიკური პარტია 2021 წლის ივნისის დასაწყისში დააფუძნა.