თბილისი, 18 იანვარი - Sputnik. დღეს საქართველოში კორონავირუსის შემთხვევების ანტირეკორდი - 7.521 შემთხვევა დაფიქსირდა, რომლის დაახლოებით 50% „ომიკრონზე“ მოდის. ამის შესახებ დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა ამირან გამყრელიძემ განაცხადა.
როგორც გამყრელიძემ აღნიშნა, ერთადერთი პოზიტივი არის ის, რომ ყველაზე მძიმე ინდიკატორი - სიკვდილიანობა თანდათან იკლებს.
„თბილისში, სადაც ყველაზე მეტი შემთხვევები გვაქვს, „ომიკრონის“ წილი არის 67%, რეგიონებში ეს წილი 30-35%-ის ფარგლებში გახლავთ. მეორე ადგილზე „ომიკრონის“ ცირკულაციით გახლავთ იმერეთი, შემდეგ აჭარა და შიდა ქართლი“, - განაცხადა გამყრელიძემ.
18 იანვარს საქართველოში ინფიცირებულთა რაოდენობამ 1 მილიონს გადააჭარბა (1.006.864), რეკორდულად მაღალი მაჩვენებელია ბოლო დღე–ღამეში გამოვლენილი შემთხვევების – 7.521. ეპიდემიოლოგების თქმით, იანვრის ბოლოს – თებერვლის დასაწყისში ეს რაოდენობა კიდევ უფრო მოიმატებს და პიკს მიაღწევს.
სპეციალისტები მოსახლოებას მოუწოდებენ დაიცვან კორონავირუსის წინააღმდეგ შემუშავებული რეკომენდაციები, ატარონ პირბადე, დაიცვან სოციალური დისტანცია და მოერიდონ ხალხმრავალ ადგილებს.