თბილისი, 14 იანვარი - Sputnik. თბილისის ინფექციური საავადმყოფოს ხელმძღვანელი თენგიზ ცერცვაძე განმარტავს, რატომ ემართებათ ყველაზე ხშირად კოვიდინფიცირებულ პაციენტებს შიდაჰოსპიტალური ინფექციები.
ჯანდაცვის ყოფილმა მინისტრმა ეკატერინე ტიკარაძემ გასული წლის დეკემბერში განაცხადა, რომ უწყების მთავარი გამოწვევაა ინფექციის კონტროლი, რადგან ხშირ შემთხვევაში ლეტალობის გამომწვევი მიზეზი არა კოვიდი, არამედ სხვადასხვა ჰოსპიტალური ინფექცია ხდება.
ცერცვაძემ ყოფილი მინისტრის განცხადებაზე კომენტირებისას განაცხადა, რომ კლინიკებში, სამწუხაროდ, ცირკულირებს გარკვეული ბაქტერიული ინფექციები, განსაკუთრებით რეანიმაციულ განყოფილებებში და რადგან კოვიდინფიცირებული პირები სხვა პაციენტებზე ხშირად ხვდებიან რეანიმაციებში, ალბათობა იმისა, რომ ინტუბირებულ კოვიდავადმყოფებს ინფექცია დაემართოთ, დიდია.
„ტიკარაძემ სწორად ბრძანა, კონსტატაცია სწორად მოახდინა. თუმცა, ეს იყო წმინდა პროფესიული საკითხი, რომელიც ექიმებთან უნდა გაჟღერებულიყო და არა მოსახლეობასთან“, - განაცხადა თბილისის ინფექციური საავადმყოფოს ხელმძღვანელმა.
ცერცვაძის განმარტებით, პრობლემის აღმოფხვრას ჯანდაცვის სამინისტრო ცდილობს, თუმცა, პრობლემის აღმოფხვრა ერთ წელიწადში ვერ მოხერხდება.
„ძნელია ამოძირკვა ბაქტერიების, განსაკუთრებით რეანიმაციიდან, სადაც ხდება ინტუბაცია, ინვაზიური ჩარევები. პრობლემის აღმოფხვრა კოვიდის პანდემიას ვერ მოუსწრებს, ეს წლების განმავლობაში, ეტაპობრივად უნდა მოხდეს“, - განაცხადა ცერცვაძემ.
როგორც ტიკარაძემ დეკემბერში, უწყების ანგარიშის წარდგენისას განაცხადა, საქართველოში არის კლინიკები, სადაც ლეტალობის მაჩვენებელი 2-3%-ის ფარგლებშია და არის ისეთი კლინიკებიც, სადაც ლეტალობის დონე 15%-ია.
ყოფილმა მინისტრმა ლეტალობის მაღალი მაჩვენებლის მიზეზად კლინიკების გარკვეული ნაწილის არაკეთილსინდისიერება და ჰოსპიტალური ინფექციის კონტროლის არარსებობა დაასახელა.
საქართველოში COVID-19-ით გარდაცვალების შემთხვევები არ მცირდება. ბოლო 24 საათში ვირუსით 36 ადამიანი გარდაიცვალა. ჯამში, პანდემიის დაწყებიდან დღემდე კი COVID-19-ს 14.395 ადამიანი ემსხვერპლა.