თბილისი, 12 იანვარი – Sputnik. საქართველოს ჯანდაცვის მინისტრის მოადგილე ილია ღუდუშაური ნაძალადევის რაიონში მდებარე ყოფილ სანატორიუმ „ქართლში“ მცხოვრებ იძულებით გადაადგილებულ პირებს შეხვდა.
რამდენიმე დღის წინ დევნილებმა ავარიული კორპუსიდან განსახლებისა და საცხოვრებელი ფართებით დაკმაყოფილების მოთხოვნით აქცია გამართეს და პროტესტის ნიშნად მთელი ღამე ქუჩაში გაატარეს.
ილია ღუდუშაურის განმარტებით, ყოფილ სანატორიუმ „ქართლში“ მცხოვრები დევნილები ახალ საცხოვრებელ ფართებს 2022 წელს მიიღებენ, მანამდე კი სამინისტროს წარმომადგენლებმა დევნილ ოჯახებს დროებით ქირით გადასვლისკენ კიდევ ერთხელ მოუწოდეს.
„2022 წლის განმავლობაში აუცილებლად, უპირობოდ მოხდება ამ ოჯახების დაკმაყოფილება საცხოვრებელი ფართებით. შევთანხმდით, რომ ყოველკვირეულ რეჟიმში განხორციელდება შეხვედრები, სადაც დეტალურ ინფორმაციას მიიღებენ“, – განაცხადა ღუდუშაურმა.
მინისტრის მოადგილის განცხადებით, დევნილების უსაფრთხოება, საცხოვრებელი პირობების გაუმჯობესება და მათი საცხოვრებელი ფართებით უზრუნველყოფა სახელმწიფოს პრიორიტეტია.
მხარეების შეთანხმებით, დევნილებთან პერიოდულად შეხვედრები გაიმართება, სადაც დევნილი ოჯახები სამინისტროს მიერ გადადგმულ ნაბიჯებს პირადად გაეცნობიან.