თბილისი, 5 იანვარი — Sputnik. 1995-1999 წლებში გამოშვებული ლარის ყველა ნომინალის ბანკნოტების გამოყენების ვადა 2022 წლის 1 იანვრიდან ამოიწურა.
საქართველოს ეროვნული ბანკის მიერ გავრცელებული ინფორმაციით, აღნიშნულ წლებში გამოშვებული ბანკნოტების გადაცვლა ამიერიდან მხოლოდ ეროვნული ბანკის საკასო ცენტრშია (თბილისი, კახეთის გზატკეცილი №72) შესაძლებელი.
„1 იანვრიდან საგადამხდელო საშუალებად აღარ გამოიყენება მხოლოდ 1995 და 1999 წლების გამოშვების ლარის ბანკნოტები. 2002 წლიდან დღემდე გამოშვებული ლარის ყველა ნომინალის ბანკნოტი კი გადახდის კანონიერი საშუალებაა ქვეყნის მთელ ტერიტორიაზე და ყველა იურიდიული და ფიზიკური პირი ვალდებულია, შეუფერხებლად მიიღოს და განახორციელოს ანგარიშსწორება ამ ბანკნოტებით“, – აღნიშნულია განცხადებაში.
ქართული ეროვნული ვალუტა მიმოქცევაში 1995 წლის 2 ოქტომბრიდან შემოვიდა. 2016 წელს დაიწყო ბანკნოტების განახლება უფრო დაცული ახალი დიზაინით. 2016 წლის 1 თებერვლიდან მიმოქცევაში გამოვიდა 20 და 50 ლარის ნომინალის განახლებული ბანკნოტები, იმავე წლის 1 ნოემბრიდან – 100 ლარის ნომინალის ბანკნოტები, 2017 წლის 1 სექტემბრიდან – 5 ლარის ნომინალის, 2019 წლის 1 ოქტომბრიდან – 10 ლარის ნომინალის ბანკნოტები.