თბილისი, 23 დეკემბერი – Sputnik. კორონავირუსის ახალი „ომიკრონ“ შტამი ქვეყანაში უკვე ცირკულირებს, ცოტა ხნის წინ დაემატა კიდევ ხუთი შემთხვევა, განაცხადა დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ ტელეკომპანია „პირველი არხის“ ეთერში.
საქართველოში „ომიკრონ" შტამით ინფიცირების პირველი ორი შემთხვევა 20 დეკემბერს გამოვლინდა. ინფიცირებულებიდან ერთს აშშ-ში, მეორეს კი დუბაიში მოგზაურობის ისტორია ჰქონდა.
„ჯამში ლაბორატორიულად დადასტურებულია 29 შემთხვევა, თუმცა ალბათ გაცილებით მეტია“, - განაცხადა გამყრელიძემ.
მისი თქმით, საეჭვო შემთხვევების გადამოწმება ხდება ლუგარის ცენტრში.
„ამ შემთხვევების დაახლოებით 50 პროცენტში დასტურდება, რომ არის „ომიკრონის“ შტამი“, - განაცხადა გამყრელიძემ.
როგორც გამყრელიძემ აღნიშნა, ქვეყანაში დადასტურებულ „ომიკრონ“ შტამის ყველა შემთხვევაში დაავადება მსუბუქად მიმდინარეობს.
„ჯერჯერობით არც ერთს, გარდა ერთისა, სტაციონარული მკურნალობა არ დასჭირვებია. ინფიცირებულების უმრავლესობა ვაქცინირებულია“, – აღნიშნა გამყრელიძემ.
ჯანმრთელობის მსოფლიო ორგანიზაციამ ბოტსვანასა და სამხრეთ აფრიკის რესპუბლიკაში ნოემბრის ბოლოს გამოვლენილ ახალ შტამ B.1.1.529-ს, რომელიც „შეშფოთების გამომწვევად“ შეფასდა, ბერძნული ანბანის მე-15 ასოს მიხედვით „ომიკრონი“ უწოდა. შტამი სხვა ვარიანტებისგან იმით გამოირჩევა, რომ მომჭიდებელ ცილაში 32 მუტაცია აქვს, რაც უჩვეულოდ დიდი რაოდენობაა. ამ დროისათვის „ომიკრონი“ უკვე გამოვლენილია მსოფლიოს არაერთ ქვეყანაში. ევროკავშირმა და ბევრმა სხვა ქვეყანამ რამდენიმე აფრიკულ ქვეყანასთან ავიამიმოსვლა შეწყვიტა.
ჯერჯერობით მსოფლიოს მასშტაბით ამ შტამით ინფიცირების შედეგად გარდაცვალების ორი შემთხვევაა დაფიქსირებული. „ომიკრონით“ გამოწვეული პირველი ლეტალური შემთხვევა დიდ ბრიტანეთში დაფიქსირდა, მეორე – აშშ-ში.