თბილისი, 23 დეკემბერი — Sputnik. საქართველო საერთაშორისო კომპანიებთან კორონავირუსის საწინააღმდეგო აბების შემოტანის თაობაზე მოლაპარაკებებს აწარმოებს, განაცხადა ჯანდაცვის მინისტრის მოვალეობის შემსრულებელმა ეკატერინე ტიკარაძემ.
„მსგავსი მოლაპარაკებები ყოველთვის კონფიდენციალურად ტარდება... შემდეგ კვირაში, თუ კომპანიებისგან თანხმობა გვექნება, მოლაპარაკებების დეტალები გასაჯაროვდება“, – განაცხადა ტიკარაძემ.
იგი ასევე შეეხო ქვეყანაში კორონავირუსის ახალი „ომიკრონ“ შტამის გავრცელების საკითხს. ტიკარაძის თქმით, 23 დეკემბრისთვის დაფიქსირებულია „ომიკრონით“ ინფიცირების 24 შემთხვევა. ამასთან ლაბორატორიულად იკვლევენ 15 საეჭვო შემთხვევას. ყველა პაციენტი ვაქცინირებულია და ისინი მკურნალობის კურსს სახლის პირობებში გადიან.
როგორც ტიკარაძემ აღნიშნა, „ომიკრონის“ გავრცელების სწრაფი ტემპის გათვალისწინებით, ქვეყნის ჰოსპიტალური სექტორი მაქსიმალურად მობილიზებულია.
რაც შეეხება აბებს, რომლის შემოტანასაც საქართველო გეგმავს, კომპანია Pfizer-ის კლინიკური კვლევების შედეგებით, პერორალური პრეპარატი Paxlovid-ი მძიმე დაავადების განვითარების მაღალი რისკის მქონე პაციენტებში ჰოსპიტალიზაციისა და გარდაცვალების პრევენციის კუთხით 89%-ით ეფექტურია.
კომპანია Pfizer-ში განაცხადეს, რომ ახლახან ჩატარებული ლაბორატორიული კვლევების მონაცემებმა აჩვენა, რომ პრეპარატი, სავარაუდოდ, ინარჩუნებს ეფექტურობას კორონავირუსის „ომიკრონ“ შტამის მიმართ.
ჯანმრთელობის მსოფლიო ორგანიზაციამ ბოტსვანასა და სამხრეთ აფრიკის რესპუბლიკაში ნოემბრის ბოლოს გამოვლენილ ახალ შტამ B.1.1.529-ს, რომელიც „შეშფოთების გამომწვევად“ შეფასდა, ბერძნული ანბანის მე-15 ასოს მიხედვით „ომიკრონი“ უწოდა. ექსპერტების თქმით, ახალ შტამს ახასიათებს ყელის „ფხაჭნის“ შეგრძნება, მშრალი ხველა, თავისა და კუნთების მსუბუქად გამოხატული ტკივილი.