ორბელიანების სასახლესთან სააკაშვილის გათავისუფლების მოთხოვნით საპროტესტო აქცია გაიმართა

თბილისი, 8 დეკემბერი – Sputnik. თბილისის ცენტრში, საქართველოს პრეზიდენტის რეზიდენციის წინ ექს-პრეზიდენტ მიხეილ სააკაშვილის გათავისუფლების მოთხოვნით საპროტესტო აქცია გაიმართა, იუწყება „Sputnik-საქართველოს“ კორესპონდენტი ადგილიდან.

აქცია ოპოზიციური პარტია „ერთიანი ნაციონალური მოძრაობისა“ და სააკაშვილის ციხიდან გათავისუფლების მოძრაობის აქტივისტებმა გამართეს. აქციის ინიციატორი ტელეკომპანია „მთავარი არხის" ტელეწამყვანი ნანუკა ჟორჟოლიანი იყო.

ათონელის ქუჩაზე შეკრებილმა ასობით ადამიანმა გაშალა უზარმაზარი ბანერი წარწერით „თავისუფლება მიშას“. მათ ასევე საქართველოს პრეზიდენტთან შეხვედრა მოითხოვეს და განაცხადეს, რომ სალომე ზურაბიშვილს აქვს „ისტორიული შანსი“ – სააკაშვილის შეწყალების გზით შეცვალოს ქვეყანაში არსებული ვითარება.

თუმცა, ულტიმატუმის სახით გამოთქმული მოთხოვნის მიუხედავად, პრეზიდენტმა აქციის მონაწილეებთან შეხვედრაზე უარი განაცხადა. ექსპრეზიდენტის შეწყალებასთან დაკავშირებით სალომე ზურაბიშვილმა ჟურნალისტებს ადრე კატეგორიულად უპასუხა: „არა და არასდროს!“ ამის შემდეგ ზურაბიშვილს ამ საკითხზე დამატებითი განცხადებები არ გაუკეთებია.

სააკაშვილს ექვსი წლით პატიმრობა დაუსწრებლად მიესაჯა სისხლის სამართლის ორ საქმეზე – გირგვლიანის მკვლელობის საქმეზე მსჯავრდებულთა შეწყალების და პარლამენტის ყოფილი დეპუტატის ვალერი გელაშვილის ცემის საქმეებზე. სასამართლოში განიხილება კიდევ სამი საქმე, სადაც სააკაშვილს ბრალდებულის სტატუსი აქვს.