Balenciaga-ს ახალი სარეკლამო კამპანიის ფარგლებში კიდევ ერთხელ გამოჩნდა მომღერალი ჯასტინ ბიბერი, რომელიც ბრენდის სახეა. ჯასტინმა და ფრანგულმა მოდის სახლმა „ინსტაგრამზე“ ერთდროულად გამოაქვეყნეს ერთი და იგივე ფოტო.
„ეს მოდაა, ძვირფასო“, – წერს ბიბერი ფოტოს აღწერაში. როგორც ფოტოზე ხედავთ, ბიბერი ისეთ ტანსაცმელშია გამოწყობილი, რომელიც ძალიან ჰგავს სასულიერო პირის სამოსს.
როგორც ჩანს, „ბალენსიაგას“ კრეატიული დირექტორის დემნა გვასალიასთვის ახალ კოლექციაზე მუშაობის დროს შთაგონების წყარო სასულიერო პირების სამოსი იყო. ჯასტინისა და „ბალენსიაგას“ კოლაბორაციას მასმედიაში დიდი გამოხმაურება მოჰყვა, სოციალურ ქსელებში კი მომღერალს „მამა ჯასტინი“ უწოდეს.
„მოძღვარი მაღალ მოდაში“, „მამა ბიბერი“, „მონასტრიდან გაქცეულს ჰგავს“, „თუ ბიბერი ბალენსიაგას ამ სამოსში მოგწონთ, შეიძლება ეკლესიაში დაგპატიჟოთ?", „სახეზე ეტყობა, რომ ძალით ჩააცვეს“, „დემნამ ყველა გააშავა“, „დემნა მონასტრისთვის ამზადებს“, „შინაგანადაც უნდა გქონდეს გამოვლილი 90-იანების საქართველოს უშუქობა, უგაზობა, უპურობა, რომ გაკვდებოდეს ტანზე და რაღაცნაირად შენი იყოს", – ასე ეხმაურებიან ფანები კომენტარებში ჯასტინის ახალ ფოტოს.