ხატია შამუგიამ ნახევარი წლის წინ ახალი ცხოვრება დაიწყო. მისი 12-წლიანი წარმატებული კარიერა პარფიუმერიულ მაღაზიათა ქსელ „ისი პარიში” ერთ დღეში და დიდი გულისტკივილით დასრულდა. დღეს კი ის ერთბაშად ხუთ კომპანიაში მუშაობს.
ხატიამ ჟურნალ „სარკეს” უამბო, რომ ეს რთული პერიოდი მისმა მეუღლემ გადაატანინა, რომელიც ამ დროს მის გვერდით იყო.
„ის მძიმე დღეები მისმა აქ ყოფნამ გადამატანინა, რადგან არ მომცა იმის საშუალება, ამ ტკივილზე დიდად მეფიქრა“, – გაიხსენა ხატიამ.
მისი თქმით, ირლანდიაში, სადაც მისი მეუღლე ცხოვრობს და მუშაობს, თავადაც უნდა წასვლა, თუმცა თვლის, რომ ყველაფერს თავისი დრო აქვს და ეს დრო ჯერ არ დამდგარა.
„ამ ეტაპზე ვფიქრობ, გამიჭირდება ყველაფერის მიტოვება. ჩემი შვილიც დასაკვალიანებელია. როცა ჩვენი შვილები ცხოვრებაში მყარად დადგებიან ფეხზე, შემდეგ შეიძლება ეს ნაბიჯი ადვილიც გახდეს, ან მე წავალ მასთან, ან ის ჩამოვა ჩემთან“, – ამბობს ხატია.
ხატიას ცხოვრებაში გამოჩნდა პრინცი, რომელიც ირლანდიაში ცხოვრობს. ეს ქართველი მამაკაცი მის ბავშვობაში არსებობდა, მერვე კლასამდე უბნელები იყვნენ, შემდეგ ხატიამ საცხოვრებელი სახლი შეიცვალა და მათი გზებიც გაიყო. ამასობაში ხატია წარმატებულ ქალად იქცა, ის ქართველი ბიჭი კი ირლანდიაში წავიდა, ბიზნესი ააწყო და იმ ქვეყნის მოქალაქეც გახდა. მათი გზები წლების შემდეგ გადაიკვეთა და ძველი, ბავშვობის ნაცნობობა სერიოზულ სიყვარულში გადაიზარდა.