გუდაურის მთებში სამაშველო ოპერაცია მიმდინარეობს

სამაშველო ოპერაციას ართულებს რელიეფი და ცუდი ხილვადობა.
Sputnik
თბილისი, 23 ნოემბერი - Sputnik. გუდაურთან ახლოს საძიებო-სამაშველო ღონისძიებები მიმდინარეობს - მწვერვალ დედაენის დალაშქვრის დროს ერთი ადამიანი დაიღუპა, იუწყება ტელეარხი „მთავარი არხი“.
ტელეარხის ინფორმაციით, მაშველები გამოიძახა ბიზნესმენმა ლევან მუშკუდიანმა, რომელიც მწვერვალის დალაშქვრას მეგობართან, ბიზნესმენ ილია კოკაიასთან ერთად ცდილობდა. მუშკუდიანის თქმით, კოკაია დაცურდა, თავი დაარტყა და გარდაიცვალა.
ილია კოკაია ცნობილი ბიზნესმენია. ის ფლობს სასტუმროების ქსელს გუდაურში, ფეროშენადნობთა ქარხნის წილს და იყო საფეხბურთო კლუბ „ზესტაფონის“ მფლობელი.
ამ დროისთვის მაშველები მწვერვალისკენ მიემართებიან. სამაშველო ოპერაციას ართულებს მთიანი რელიეფი და ცუდი ხილვადობა.
საგანგებო სიტუაციების მართვის სამსახურს მედიისთვის კომენტარი ჯერ არ გაუკეთებია.