თბილისი, 22 ნოემბერი – Sputnik. პოლონეთი–ბელარუსის საზღვრის უკანონო გადაკვეთისთვის საქართველოს მოქალაქე დააკავეს. ინფორმაციას პოლონეთის სასაზღვრო სამსახური ავრცელებს.
უწყების ცნობით, კვირას, 21 ნოემბერს პოლონეთი–ბელარუსის საზღვრის უკანონო გადაკვეთის სულ 346 ფაქტი დაფიქსირდა. სასაზღვრო სამსახურმა 58 პირს პოლონეთის ტერიტორია დაატოვებინა.
საზღვრის უკანონო კვეთაში დახმარებისთვის სულ სამი პირი დააკავეს – სირიის ორი მოქალაქე და საქართველოს ერთი მოქალაქე.
კრიზისი ბელარუსის საზღვრებზე ლატვიასთან, ლიეტუვასა და პოლონეთთან, საითაც მიგრანტები წლის დასაწყისიდან დაიძრნენ, მკვეთრად გამწვავდა 8 ნოემბერს. რამდენიმე ათასი ადამიანი პოლონეთის საზღვარს მიადგა ბელარუსის მხრიდან. მიგრანტებმა რამდენჯერმე სცადეს საზღვრის ძალით გადაკვეთა, თუმცა პოლონურმა მხარემ ეს მცდელობები აღკვეთა. ევროკავშირის ქვეყნები მინსკს კრიზისის მიზანმიმართულ ესკალაციაში ადანაშაულებენ და სანქციების დაწესებას მოითხოვენ. პრეზიდენტი ლუკაშენკო აცხადებს, რომ ამ ვითარებაში თავად დასავლეთის ქვეყნები არიან დამნაშავე, რომელთა ქმედებების გამო ხალხი ომს გაურბის.