თბილისი, 20 ნოემბერი – Sputnik. საქართველოს ექს–პრეზიდენტი მიხეილ სააკაშვილი გლდანის ციხის საავადმყოფოდან უკვე გორის სამხედრო ჰოსპიტალშია გადაყვანილი.
იუსტიციის მინისტრმა რატი ბრეგაძემ პარასკევს მიხეილ სააკაშვილს მკურნალობა გორის სამხედრო ჰოსპიტალში შესთავაზა. უფრო ადრე ექს–პრეზიდენტმა განაცხადა, რომ შეწყვეტს შიმშილობას, თუ მას ციხის საავადმყოფოდან სამოქალაქო მრავალპროფილურ კლინიკაში გადაიყვანდნენ.
რეანიმობილმა, რომელშიც სააკაშვილი იყო მოთავსებული, მთელი გზა ყოველგვარი ინციდენტის გარეშე გაიარა.
სააკაშვილს თან ახლდნენ პირადი ექიმი ნიკოლოზ ყიფშიძე, ადვოკატები ნიკა გვარამია და დიმიტრი საძაგლიშვილი.
გორის ჰოსპიტალი დღეს ჯანდაცვის მინისტრმა პირადად მოინახულა და აღნიშნა, რომ ის სრულად არის აღჭურვილი იმ მატერიალურ-ტექნიკური ბაზით, რომელიც ესაჭიროება ექს-პრეზიდენტ მიხეილ სააკაშვილს.
სააკაშვილმა შიმშილობა დაკავების დღეს, 1 ოქტომბერს გამოაცხადა. ის თავს პოლიტპატიმარს უწოდებს, ხოლო ბრალდებებს – გაყალბებულს. ექს–პრეზიდენტის ადვოკატები და პირადი ექიმი დიდი ხანია მოითხოვენ სააკაშვილის მრავალპროფილურ სამოქალაქო კლინიკაში გადაყვანას.