თბილისი, 19 ნოემბერი — Sputnik. საქართველოს მოქალაქეებს, რომლებმაც კორონავირუსის საწინააღმდეგო ვაქცინის სრული კურსი გაზაფხულზე ჩაიტარეს, წლის ბოლომდე მესამე, ე.წ. ბუსტერ–დოზის გაკეთება მოუწევთ, განაცხადა დაავადებათა კონტროლის ეროვნული ცენტრის ხელმძღვანელმა ამირან გამყრელიძემ ჟურნალისტებთან.
„ჩვენი გათვლებით, მათ, ვინც გაზაფხულზე აიცრა, საუბარია 30–40 ათას ადამიანზე, წლის ბოლომდე „ბუსტერ–დოზის“ გაკეთება მოუწევთ. შემდეგ კი იანვარი–თებერვალი–მარტში მესამე დოზას გაიკეთებენ ის პირები, ვინც ივნისი–ივლისი–აგვისტოში გაიკეთა აცრა“, – განაცხადა გამყრელიძემ.
მისი თქმით, მომავალ წელს ვაქცინის მესამე დოზით აცრა 300–400 ათას ადამიანს მოუწევს.
ეპიდემიოლოგი ასევე შეეხო ბავშვთა ვაქცინაციის საკითხს. მისი თქმით, ბოლო მონაცემებით, 12–15 წლის ასაკობრივ კატეგორიაში პრეპარატ Pfizer-ით პირველი აცრა 850-ზე მეტმა მოზარდმა გაიკეთა, სრულად (ორი დოზით) კი ვაქცინირებულია 60 მოზარდი. რაც შეეხება 16–17 წლის ახალგაზრდებს, ვაქცინირებულთა რიცხვი 10–11 ათასს აღწევს.
9 ნოემბერს იმუნიზაციის საბჭოს სხდომაზე მხარი დაუჭირეს მოზარდების აცრას Pfizer-ის ვაქცინის ორი დოზით. მოზარდების ვაქცინაცია მხოლოდ მშობლების თანხმობით ტარდება. მანამდე აღნიშნულ ასაკობრივ ჯგუფში ვაქცინაციას ექვემდებარებოდნენ მხოლოდ ქრონიკული დაავადების მქონე ბავშვები.
საქართველოში კორონავირუსის საწინააღმდეგო მესამე დოზით ვაქცინაცია 18 წელს ზემოთ ყველა პირისთვის დაშვებულია. „ბუსტერ–დოზის“ გაკეთება მოსახლეობას ჯანმრთელობის მსოფლიო ორგანიზაციის მიერ ავტორიზებული Pfizer-ის პრეპარატებით შეუძლია.