თბილისი, 19 ნოემბერი — Sputnik. აშშ-ის რამდენიმე შტატის გენერალურ პროკურორთა ჯგუფი კომპანია Meta-ს (ყოფილი Facebook) ქმედებებს იძიებს, რომლებიც ბავშვებისა და მოზარდების Instagram-ზე მიზიდვას უკავშირდება, იუწყება The Wall Street Journal.
გავრცელებული ინფორმაციით, ჯგუფი გამოიძიებს, არღვევს თუ არა სოციალური ქსელი მომხმარებელთა უფლებების დაცვის შესახებ კანონს, უქმნის თუ არა რისკებს საზოგადოებას და აყენებს თუ არა ზიანს ახალგაზრდების ფსიქიკურ ჯანმრთელობას.
როგორც ირკვევა, პროკურორები უკმაყოფილო არიან იმ მეთოდებით, რომლებსაც Meta მის პლატფორმებზე ახალგაზრდა მომხმარებლების შესაყვანად და იქ დიდი ხნის განმავლობაში დასარჩენად იყენებს.
აღინიშნება, რომ გამოძიების დაწყებამდე ჩატარდა შიდა კვლევა, რომლის მიზანიც მოზარდებზე Instagram-ის გავლენის დადგენა იყო.
როგორც კვლევამ აჩვენა, პლატფორმას შეუძლია გამოიწვიოს „ნეგატიური სოციალური შედარება“ და მომხმარებელთა ფსიქოლოგიური პრობლემების გაღრმავება, ვინაიდან Instagram-ზე ატვირთული ფოტოების უმეტესობაზე აქცენტი გარეგნობაზე კეთდება. კერძოდ, საუბარია ისეთ ნეგატიურ შედეგებზე, როგორებიცაა სუიციდური აზრები, თვითდაზიანება და კვებითი ქცევების დარღვევა.
გამოძიებაში მონაწილეობენ კალიფორნიის, ფლორიდის, კენტუკის, მასაჩუსეტსის, ნებრასკის, ნიუ-ჯერსის, ტენესისა და ვერმონტის შტატების გენერალური პროკურორები.
ოქტომბერში Facebook-ის ყოფილმა თანამშრომელმა ფრენსის ჰაუგენმა ჩვენება მისცა აშშ-ის სენატს და კომპანია ცრუ ინფორმაციის გავრცელებასა და საზოგადოებაში უთანხმოების ფორმირებაში დაადანაშაულა. როგორც მაშინ WSJ წერდა, Facebook-ის ხელოვნურ ინტელექტს არ გააჩნია სოციალური ქსელის კონტენტის ეფექტურად მოდერატორობის უნარი. მარკ ცუკერბერგმა პრესაში გამოქვეყნებული პუბლიკაციები Facebook-სთვის ცილის დაწამების მცდელობად შეაფასა.