„მე და დიეგო“ – ფრიდა კალოს ავტოპორტრეტი რეკორდულ ფასად გაიყიდა

თბილისი, 17 ნოემბერი — Sputnik. ნიუ-იორკის Sotheby's-ის აუქციონზე ფრიდა კალოს ავტოპორტრეტი სახელწოდებით „დიეგო და მე“ 34,9 მილიონ დოლარად გაიყიდა, რაც რეკორდული თანხაა ლათინურამერიკელ მხატვართა ნამუშევრებისთვის, იუწყება ВВС News.

ტილოზე, რომელიც 1949 წლით თარიღდება, მხატვარი ქალი ტირის, ხოლო შუბლზე ქმრის, ასევე მხატვარ დიეგო რივერას პორტრეტი აქვს გამოსახული. დიეგოს შუბლზე კი მესამე თვალია ჩახატული.

გავრცელებული ინფორმაციით, ნახატი ნიუიორკელი კოლექციონერის მემკვიდრემ გაიტანა გასაყიდად, რომელსაც ის 1990 წელს ჰქონდა შეძენილი ასევე Sotheby’s აუქციონზე 1,4 მილიონ დოლარად. მანამდე ტილო ჩიკაგოელ მწერალ ქალს ფლორენს არკინს ეკუთვნოდა, რომელიც ფრიდა კალოსთან და დიეგო რივერასთან მეგობრობდა.

როგორც New York Times-ი წერს, ავტოპორტრეტის თავდაპირველი ფასი აუქციონზე 30 მილიონი დოლარი იყო. საბოლოოდ ის 34,9 მილიონად შეიძინა ედუარდო კონსტანტინიმ, ლათინურამერიკული ხელოვნების მუზეუმის Malba-ს დამაარსებელმა ბუენოს-აირესში.

აღინიშნება, რომ აქამდე ფრიდა კალოს ნამუშევრებისთვის რეკორდული ფასი 8 მილიონი დოლარი იყო. სწორედ ამ ფასად გაიყიდა 2016 წელს Christie’s-ის აუქციონზე მისი 1939 წლის ნახატი „ორი შიშველი ქალი ტყეში“.

რაც შეეხება ზოგადად ლათინურამერიკელ მხატვართა ნამუშევრების წინა რეკორდულ ფასს, ის დიეგო რივერას ნახატ The Rivals-ს („მეტოქეები“) ეკუთვნის, რომელიც 2018 წელს 9,76 მლნ დოლარად გაიყიდა Christie’s-ის აუქციონზე.