თბილისი, 11 ნოემბერი — Sputnik. თბილისი UNESCO-ს შემოქმედებითი ქალაქების ქსელის წევრი გახდა მედია ხელოვნების მიმართულებით, ნათქვამია საქართველოს კულტურის, სპორტისა და ახალგაზრდობის სამინისტროს მიერ გავრცელებულ ინფორმაციაში.
თბილისი UNESCO-ს შემოქმედებითი ქალაქების ქსელის რიგით 49-ე ქალაქია. საქართველოს დედაქალაქს Tbilisi - UNESCO City of Media Arts სტატუსი ოფიციალურად დღეს მიენიჭა.
„მომდევნო ოთხი წელი თბილისისთვის უდიდესი გამოწვევების, ინოვაციური ნაბიჯებისა და პასუხისმგებლობის წლები იქნება. ეს ჩვენს თანამედროვე არტისტებს, ციფრული ტექნოლოგიების სპეციალისტებს და მომიჯნავე სფეროების წარმომადგენლებს, მსოფლიო მნიშვნელობის პროექტების განხორციელებისა და თბილისის, როგორც ერთგვარი შემოქმედებითი ჰაბის პოზიციონირების საშუალებას მისცემს”, — განაცხადა თბილისის მერის მოადგილემ, ანდრია ბასილაიამ.
გარდა ამისა, რამდენიმე თვის წინ თბილისს UNESCO-ს წიგნის მსოფლიო დედაქალაქის სტატუსი მიენიჭა.
გარდა ამისა, ბათუმს UNESCO-ს მუსიკის ქალაქის წოდება მიენიჭა.
UNESCO-ს შემოქმედებითი ქალაქების ქსელი (UCCN) 2004 წელს შეიქმნა და აერთიანებს ქალაქებს, რომლებშიც კულტურა და შემოქმედება მოწინავე ადგილებს იკავებს. ქსელი ქალაქებს შვიდი სფეროს მიხედვით არჩევს — ხელნაკეთობები და ხალხური ხელოვნება, დიზაინი, კინო, გასტრონომია, ლიტერატურა, მედია ხელოვნება და მუსიკა. თითოეულ შემოქმედებით ქალაქში კრეატიულობა და მისი განვითარება აქტუალობის ცენტრშია, რათა გააძლიეროს ინკლუზიურობა, უსაფრთხოება და მდგრადობა.