თბილისი, 4 ნოემბერი – Sputnik. საქართველოს ყოფილი პრეზიდენტის მიხეილ სააკაშვილის დედამ გიული ალასანიამ უკრაინის პრეზიდენტ ვლადიმირ ზელენსკის მოუწოდა, დაეხმაროს მის შვილს და ორგანიზება გაუწიოს მის გადაყვანას ქართული ციხიდან უკრაინაში სამკურნალოდ.
სააკაშვილი არის უკრაინის მოქალაქე და ქვეყნის რეფორმების ეროვნული საბჭოს აღმასრულებელი კომიტეტის ხელმძღვანელი.
„ჩემს შვილს თვალწინ მიკლავენ. მინდა მივმართო ბატონ ზელენსკის, რომელიც არაერთხელ დაგვეხმარა, მაგრამ ახლა განსაკუთრებით გვჭირდება მისი მხარდაჭერა და დახმარება. საჭიროა როგორმე ორგანიზება გაეწიოს მიხეილის აქ, უკრაინაში გადმოყვანას, რათა აქ მიიღოს შესაბამისი მკურნალობა, შესაბამისი მოვლა და როგორმე გადარჩეს“, – განაცხადა გიული ალასანიამ ვიდეომიმართვაში, რომელიც ხუთშაბათს სააკაშვილის Facebook-გვერდზე გამოქვეყნდა.
მან ხაზი გაუსვა, რომ სააკაშვილი უკვე 35-ე დღეა შიმშილობს.
„შეგიძლიათ წარმოიდგინოთ?! ნებისმიერ მომენტში ყველაფერი შეიძლება მოხდეს. მაგრამ ეს არავის აწუხებს. ერთადერთი, რასაც სთავაზობენ ჩემს შვილს, ციხის საავადმყოფოა, სადაც არ არიან შესაბამისი სპეციალისტები, საერთოდ არ არის პირობები ასეთი პაციენტების მკურნალობისთვის“, – აღნიშნა გიული ალასანიამ.
მიხეილ სააკაშვილი უკრაინიდან საქართველოში 29 სექტემბერს მალულად ჩამოვიდა და 1 ოქტომბერს ის თბილისში დააკავეს. სააკაშვილი თავს პოლიტიკურ პატიმრად მიიჩნევს, ხოლო მის წინააღმდეგ მიმდინარე სისხლის სამართლის საქმეებს – ფაბრიკაციად.
ყოფილი პრეზიდენტი სასამართლომ დაუსწრებლად ცნო დამნაშავედ სანდრო გირგვლიანის მკვლელობის საქმეზე დაპატიმრებულთა შეწყალების და დეპუტატ ვალერი გელაშვილის ცემის საქმეებზე. მას 6 წლით თავისუფლების აღკვეთა აქვს მისჯილი.