თბილისი, 4 ნოემბერი − Sputnik. გამომდინარე იქიდან, რომ კორონავირუსის „დელტა“ შტამის დამანგრეველი ტალღა მსოფლიოს ბევრ რეგიონში სუსტდება, მეცნიერები უკვე იძლევიან პროგნოზებს, სად და რომელ ქვეყანაში გადაიქცევა COVID-19 ენდემურ დაავადებად 2022 წლიდან, იუწყება Reuters.
სააგენტოს მიერ გამოკითხული არაერთი ექსპერტის აზრით, პანდემიიდან პირველები გამოვლენ ის ქვეყნები, რომლებშიც, ვაქცინაციის მაღალი მაჩვენებლების გარდა, ასევე დიდი იქნება კორონავირუსით ინფიცირების შემდეგ ბუნებრივი იმუნიტეტის მქონეთა რაოდენობაც.
ექსპერტებს მიაჩნიათ, რომ ასეთი ქვეყნები არიან: აშშ, დიდი ბრიტანეთი, პორტუგალია და ინდოეთი.
„ვფიქრობთ, რომ დღეიდან 2022 წლის ბოლომდე პერიოდი სწორედ ის მომენტია, როდესაც ვირუსზე კონტროლს დავამყარებთ... და შევძლებთ მნიშვნელოვნად შევამციროთ დაავადების მძიმე ფორმები და სიკვდილიანობა“, − განუცხადა სააგენტოს ჯანმოს წარმომადგენელმა მარია ვან კერკჰოვემ.
ამასთან ეპიდემიოლოგები აცხადებენ, რომ დაავადება COVID-19-ის გამომწვევი ვირუსი SARS-CoV-2 კვლავაც რჩება არაპროგნოზირებად ვირუსად, რომელიც მუტაციას განაგრძობს არავაქცინირებულ ადამიანებში გავრცელების კვალდაკვალ.
მართალია, სპეციალისტების ნაწილი სრულად არ გამორიცხავს ე.წ. განკითხვის დღეს, როდესაც ვირუსი იმ დონემდე განიცდის მუტაციას, რომ იმუნიტეტს დაუსხლტება, მაგრამ მაინც დარწმუნებული არიან, რომ ბევრი ქვეყანა უკვე მომავალ წელს დააღწევს თავს პანდემიას.