COVID-19 - ბოლო ცნობები

რევაქცინაციის ვადები და პრეპარატები: ჯანმოს ექსპერტმა რეკომენდაცია გასცა

Sputnik
თბილისი, 3 ნოემბერი − Sputnik. კორონავირუსზე აცრის შემდეგ ორგანიზმის იმუნური დაცვა მხოლოდ რამდენიმე თვის განმავლობაშია შენარჩუნებული, ამიტომ მესამე დოზით რევაქცინაცია აუცილებელია. ასეთი რეკომენდაცია გასცა ჯანმრთელობის მსოფლიო ორგანიზაციის (ჯანმო) ექსპერტმა, პროფესორმა სანტიაგო მას-კომამ.
COVID-19-ზე ვაქცინაცია წლების განმავლობაში იქნება საჭირო: ბრიტანელი მეცნიერების ანგარიში
მისი თქმით, გამომდინარე იქიდან, რომ ხანდაზმული ადამიანები ყველაზე პირველები აცრეს, შეძენილი იმუნიტეტი კი მათ ყველაზე ნაკლები ხნის განმავლობაში უნარჩუნდებათ, მათი რევაქცინაცია პრიორიტეტული წესით უნდა მოხდეს.

„საუკეთესო ვარიანტია იმ პრეპარატებით რევაქცინაცია, რომლებიც ახალ შტამებთან, მათ შორის, „დელტა“ ვარიანტთან ბრძოლისთვის არის მოდიფიცირებული. ამ მიზნით ყველაზე მარტივია mRNA ვაქცინების გამოყენება მათი სინთეზის პროცესების თავისებურებების გამო“, − აცხადებს ექსპერტი.

რაც შეეხება განმეორებითი აცრების ვადებს, ეპიდემიოლოგის თქმით, მეცნიერებმა ჯერ კიდევ უნდა გაარკვიონ – ღირს თუ არა ვაქცინაცია გახდეს ყოველწლიური (როგორც ეს გრიპის შემთხვევაშია) ან კიდევ უფრო ხშირი, ანუ რამდენიმე თვეში ერთხელ გაკეთდეს.
„ეს ასევე შეიძლება დამოკიდებული იყოს ასაკობრივ ჯგუფებზე: აცრებს შორის უფრო ხანგრძლივი შუალედი ახალგაზრდებისთვის და უფრო მოკლე შუალედი – ასაკოვანი ადამიანებისთვის“, − განმარტა მას-კომამ.
მანამდე ჯანმოს წარმომადგენელმა მელიტა ვუინოვიჩმა განაცხადა, რომ ამჟამინდელი რეკომენდაციით, დაქვეითებული იმუნიტეტის მქონე ადამიანებმა ბუსტერული დოზით რევაქცინაცია მეორე დოზის შეყვანიდან ექვსი თვის შემდეგ უნდა გაიკეთონ.