თბილისი, 31 ოქტომბერი – Sputnik. ქუთაისში უცნობმა პირებმა ექს-პრემიერ გიორგი გახარიას პარტიის „საქართველოსთვის“ სიის პირველი ნომრის, საკრებულოს წევრ ელეონორა არჩაიას მანქანა დააზიანეს, იუწყება ქართული მედია.
არჩაიას თქმით, ეს იმ დროს მოხდა, როდესაც თავად ეკლესიაში წირვას ესწრებოდა.
ის მომხდარს თავის პოლიტიკურ საქმიანობას უკავშირებს. საკრებულოს დეპუტატის თქმით, ამას ისიც ადასტურებს, რომ მანქანიდან არ დაკარგულა პირადი ნივთები.
„ეკლესიაში 40 წუთი ვიყავი. როდესაც გამოვედი, ვნახე, რომ მანქანის მინები ჩამსხვრეულია. ჩანთა წაღებული არ არის და ტელეფონი არ არის წაღებული. ეს მიზანმიმართულად არის გაკეთებული", - ამბობს არჩაია.
პოლიტიკოსის თქმით, მასზე ზეწოლა მას შემდეგ ხორციელდება, რაც მან მმართველი პარტიის რიგები დატოვა და გახარიას გუნდს შეუერთდა. საფრთხე ემუქრება მის ბიზნესსაც, აღნიშნა არჩაიამ.
მედიის ინფორმაციით, ადგილზე პოლიცია მივიდა. თავდამსხმელი იდენტიფიცირებული არ არის.