თბილისი, 31 ოქტომბერი - Sputnik. მმართველი პარტია „ქართული ოცნება - დემოკრატიული საქართველო“ ოპოზიციასთან აწარმოებს მოლაპარაკებებს ცალკეულ საკრებულოებში უმრავლესობის ფორმირებისთვის, განაცხადა პარტიის ლიდერმა ირაკლი კობახიძემ.
ცესკოს წინასწარი მონაცემებით, მმართველმა პარტიამ ვერ მოიპოვა უმრავლესობა რამდენიმე ქალაქისა და მუნიციპალიტეტის საკრებულოში: რუსთავში, ბათუმში, ზუგდიდში, წალენჯიხაში, ჩხოროწყუსა და სენაკში.
„ჩვენ პარტიას მყარი უმრავლესობა აქვს თითქმის ყველა მუნიციპალურ საკრებულოში. რამდენიმე საკრებულოში, სადაც „ქართულ ოცნებას“ ერთპარტიული უმრავლესობა არ აქვს, უმრავლესობა საკრებულოს წევრებთან მოლაპარაკებების საფუძველზე ჩამოყალიბდება. ამ საკითხზე მუშაობა უკვე წარმატებით დაწყებულია“, - განაცხადა კობახიძემ.
ვისთან მიმდინარეობს მოლაპარაკებები, მმართველი პარტიის თავმჯდომარეს არ დაუკონკრეტებია. არჩევნების შედეგების მიხედვით, „ქართულ ოცნებას“ აქვს ორი ვარიანტი: ან მოელაპარაკოს ექს-პრემიერ გიორგი გახარიას პარტიას, ან თავის მთავარ ოპონენტს - ყველაზე მსხვილ ოპოზიციურ პარტიას „ერთიან ნაციონალურ მოძრაობას“.
ადგილობრივი არჩევნები 2 ოქტომბერს გაიმართა. ცალკეულ ქალაქებსა და მუნიციპალიტეტებში 30 ოქტომბერს მეორე ტური ჩატარდა. არჩევნების საბოლოო შედეგები 13 ნოემბრამდე გამოცხადდება.