თბილისი, 31 ოქტომბერი – Sputnik. ოპოზიციური პარტია „ერთიანი ნაციონალური მოძრაობის“ კანდიდატი გიორგი ხარჩილავა, რომელიც ცესკოს წინასწარი მონაცემებით წალენჯიხის მერის არჩევნების მეორე ტურს იგებს, პირობას დებს, რომ ყველა მოქალაქის პრობლემებს გაიზიარებს.
ამ დროისთვის წალენჯიხა ერთადერთი მუნიციპალიტეტია, სადაც ოპოზიციის წარმომადგენელი ლიდერობს. დანარჩენ 19 ქალაქსა და მუნიციპალიტეტში უპირატესობა „ქართული ოცნება - დემოკრატიული საქართველოს“ კანდიდატების მხარესაა.
ცესკოს წინასწარი მონაცემებით, ხარჩილავამ მოიპოვა ამომრჩეველთა ხმების 51,11%, ხოლო „ქართული ოცნების“ კანდიდატმა გიორგი გულორდავამ - 48,89%.
„მე ვპირდები ჩემს მოსახლეობას, რომ ყველას მერი ვიქნები. მათი პრობლემების გამზიარებელი. აქ უკვე კოალიციური მთავრობა შედგა. აქ კოალიციური საკრებულო შედგა. საკრებულოში უმრავლესობა მოიპოვა, ოპოზიციურმა ძალებმა და მთლიანობაში ეს იძლევა მექანიზმს, რომ არ არსებობდეს, ნეპოტიზმი, კორუფცია და სატენდერო სქემები გაყალბებული კორუფციის გზით", - განაცხადა გიორგი ხარჩილავამ.
მისი თქმით, დღეიდან ყოველი თეთრი წალენჯიხელების საჭიროებებს მოხმარდება.
სამეგრელოს რეგიონის წალენჯიხის მუნიციპალიტეტის მოსახლეობა 25 ათასამდე ადამიანს შეადგენს.