თბილისი, 18 ოქტომბერი – Sputnik. აშშ-ის თავდაცვის მინისტრი ლოიდ ოსტინი ამ კვირაში ევროპაში ვიზიტს საქართველოდან იწყებს. ის თბილისში ორშაბათს, 18 ოქტომბერს ჩამოვიდა.
„შეერთებული შტატები მტკიცედ არის განწყობილი, დაეხმაროს საქართველოს თავდაცვისუნარიანობის გაძლიერებასა და ევროატლანტიკური ინტეგრაციის გზაზე წინსვლაში. მოუთმენლად ველოდები შეხვედრებს“, – დაწერა ოსტინმა Twitter-ში.
საქართველოში ვიზიტისას პენტაგონის მეთაური შეხვდება საქართველოს პრემიერ ირაკლი ღარიბაშვილსა და თავდაცვის მინისტრ ჯუანშერ ბურჭულაძეს.
შეხვედრებზე განიხილავენ აშშ-ისა და საქართველოს თანამშრომლობის, გლობალური უსაფრთხოებისა და რეგიონულ საკითხებს.
საქართველოს შემდეგ ოსტინი გაემგზავრება უკრაინასა და რუმინეთში, ხოლო ევროპაში ტურნეს ბრიუსელში ნატოს მინისტერიალში მონაწილეობით დაასრულებს.