თბილისი, 18 ოქტომბერი – Sputnik. ბოლო პერიოდში კორონავირუსით ინფიცირების შემთხვევების რაოდენობის ზრდა ქუჩის აქციებს უკავშირდება, განაცხადა საქართველოს ჯანდაცვის მინისტრის მოადგილემ, თამარ გაბუნიამ პარლამენტის საფინანსო-საბიუჯეტო კომიტეტის სხდომაზე.
„რაც არჩევნებს თავყრილობების სახით მოჰყვა, რა თქმა უნდა, რისკის ფაქტორი იყო - ვხედავთ, რომ პირბადის გამოყენება და სხვა წესები ამ შემთხვევებში დაცული არ არის“, - განაცხადა გაბუნიამ.
გაბუნიას განცხადებით, მომატებული მობილობა ეპიდემიის აღმასვლას უწყობს ხელს.
„რამ გამოიწვია ბოლო პერიოდში გამწვავება, რომ ისევ თითქმის 5000-მდე მივედით. ბოლო პერიოდში მობილობის ისევ უჩვეულო მატება გვაქვს. არის ქუჩის აქციები. თვითონ არჩევნები იმდენად რისკი არ არის, რადგან არჩევნების გარემო მართვადია“, - განაცხადა თამარ გაბუნიამ.
საქართველოში ახალი კორონავირუსით დაავადებულთა რაოდენობა ბოლო დღე-ღამეში 2.479-ით გაიზარდა და ინფიცირებულთა საერთო რიცხვმა 666.813-ს მიაღწია. 17 ოქტომბერს იყო 4.581 ახალი შემთხვევა, 16 ოქტომბერს - 5.076.
საქართველოში კორონავირუსის პირველი შემთხვევა 2020 წლის 26 თებერვალს დაფიქსირდა.