თბილისი, 18 ოქტომბერი – Sputnik. ჯუზეპე ვერდის ოპერის „ბედის ძალა“ პრემიერა ზაქარია ფალიაშვილის სახელობის თბილისის ოპერისა და ბალეტის თეატრის სცენაზე 29 ოქტომბერს გაიმართება.
„ბედის ძალა“ (იტალ. La forza del destino) — ანხელ საავედრას დრამის „დონ ალვარო, ანუ ბედის ძალა“ მიხედვით ფრანჩესკო მარია პიავეს ლიბრეტოზე შექმნილი ოპერაა. დაწერილია სანქტ-პეტერბურგის დიდი თეატრისთვის, სადაც პირველად 1862 წლის 10 ნოემბერს დაიდგა. ეს ვერდის ერთადერთი ოპერაა, რომელიც სპეციალურად რუსული თეატრისთვის არის დაწერილი.
შემდგომში ოპერა ასევე დაიდგა რომში, მადრიდში, ნიუ-იორკში, ვენაში, ბუენოს-აირესსა და ლონდონში. მას შემდეგ, რაც ვერდიმ ოპერაში გარკვეული ცვლილებები შეიტანა ანტონიო გისლანცონისთან ერთად, ახალი, დღევანდელი ვერსიის პრემიერა 1869 წლის 27 თებერვალს, მილანში, „ლა სკალაში“ შედგა.
თბილისში ოპერა იქნება ნაჩვენები პარმის სამეფო ოპერის თეატრის დადგმით. რეჟისორი, სცენოგრაფი და კოსტუმების დიზაინერი - სტეფანო პოდა (Stefano Poda), დირიჟორი - ზაზა აზმაიფარაშვილი.
საპრემიერო ჩვენებები გაიმართება 29, 30, 31 ოქტომბერს და 7,13 და 14 ნოემბერს. ბილეთების შეძენა შესაძლებელია თეატრის სალაროში და ონლაინ.