თბილისი, 5 ოქტომბერი – Sputnik. ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვა-ტარების ბრალდებით იმერეთსა და ქვემო ქართლში ორი პირი დააკავეს, ნათქვამია შინაგან საქმეთა სამინისტროს განცხადებაში.
გამოძიების ცნობით, ერთ-ერთი დაკავებულის ავტომობილის ჩხრეკისას სამართალდამცველებმა „მაკაროვის“ სისტემის ცეცხლსასროლი იარაღი, მჭიდი და 8 საბრძოლო ვაზნა ამოიღეს.
რაც შეეხება მეორე პირს, იგი პოლიციამ მარნეულის მუნიციპალიტეტის სოფელ ალგეთის მიმდებარე ტერიტორიაზე დააკავა. მისი პირადი ჩხრეკისას სამართალდამცველებმა „ნაგანის“ სისტემის ცეცხლსასროლი იარაღი ამოიღეს 6 ვაზნით.
ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვისა და ტარების ფაქტებზე გამოძიება სსკ-ის 236-ე მუხლის მესამე და მეოთხე ნაწილებით მიმდინარეობს.