თბილისი, 2 ოქტომბერი - Sputnik. ჩემი თავისუფლება და რაც ათასჯერ უფრო მნიშვნელოვანია, საქართველოს თავისუფლება მთლიანად დამოკიდებულია უახლოეს დღეებში თქვენს აქტიურობასა და ბრძოლისუნარიანობაზე, წერია მიხეილ სააკაშვილის წერილში, რომელსაც „მთავარი არხის“ გენერალური დირექტორი ნიკა გვარამია ავრცელებს.
საქართველოს პრემიერ-მინისტრმა ირაკლი ღარიბაშვილმა გუშინ საგანგებო ბრიფინგზე გამოაცხადა, რომ ქვეყნის ყოფილი პრეზიდენტი მიხეილ სააკაშვილი სპეცოპერაციის შედეგად დააკავეს. სააკაშვილი რუსთავის პენიტენციურ დაწესებულებაშია გადაყვანილი.
მიხეილ სააკაშვილი თავის წერილში კიდევ ერთხელ აღნიშნავს, რომ მან საქართველოში ჩამოსვლამდე იცოდა, რომ დააკავებდნენ. მიუხედავად ამისა, საქართველოს ექს-პრეზიდენტი მის წინააღმდეგ წაყენებულ ბრალდებებს მოგონილსა და ყალბს უწოდებს.
„ჩემო ძვირფასო თანამებრძოლებო და ჩემო სათაყვანებელო ქართულო საზოგადოება, როდესაც ყველაფერი მივატოვე კიევში და აქ ჩამოვედი, ვიცოდი, რომ დიდი ალბათობით დამაკავებდნენ სრულად მოგონილი ყალბი განაჩენებით, რომლებიც თავის დროზე, მათ შორის პუტინის დაკვეთით გამომიტანეს. მსოფლიოს არცერთი ქვეყანა, რუსეთის გარდა, ამ განაჩენებს არ აღიარებს, მაგრამ მე მაინც ჩამოვედი, რადგან მჯერა ჩემი ქვეყნისა და თითოეული თქვენგანის!“ - წერს სააკაშვილი.
ყოფილი პრეზიდენტი მოსახლეობას კიდევ ერთხელ მოუწოდებს თვითმმართველობის არჩევნებზე მისვლისკენ და აქტიურობისკენ. „ამაზეა დამოკიდებული საერთაშორისო მხარდაჭერა. გთხოვთ, არ შედრკეთ და ბოლომდე ვირწმუნოთ, რომ ჩვენი გამარჯვება ჩვენსავე ხელშია. მიყვარხართ, თქვენი ერთგული მ. სააკაშვილი“, - აღნიშნულია წერილში.
1 ოქტომბრის დილით, ექს-პრეზიდენტმა მიხეილ სააკაშვილმა საკუთარ ფეისბუქ-გვერდზე ბათუმში ჩაწერილი ვიდეო-მიმართვა გაარცელა და განაცხადა, რომ სამშობლოში დაბრუნდა. ხელისუფლებაში მთელი დღის განმავლობაში აცხადებდნენ, რომ ეს ფეიკ-ინფორმაცია იყო და ექს-პრეზიდენტს საქართველოს საზღვარი ოფიციალურად არ გადმოუკვეთია.
სააკაშვილმა 2 ოქტომბრის არჩევნებისთვის საქართველოში ჩამოსვლა 27 სექტემბერს დააანონსა, რის დასტურადაც „კიევი–თბილისის“ ავიარეისის ბილეთის ჯავშნის ფოტო გამოაქვეყნა. მიხეილ სააკაშვილმა საქართველო 2013 წლის ნოემბერში დატოვა და მას შემდეგ სამშობლოში აღარ დაბრუნებულა, თუმცა არაერთხელ დადო უკან დაბრუნების პირობა. ექს-პრეზიდენტზე შიდასახელმწიფოებრივი ძებნა იყო გამოცხადებული. 2015 წელს მას ჩამოერთვა საქართველოს მოქალაქეობა და უკვე ექვსი წელია ის უკრაინის მოქალაქეა.