თბილისი, 2 ოქტომბერი - Sputnik. ყველანი ერთად, საქართველოს მოქალაქეები დღეს არჩევანს ვაკეთებთ წარსულსა და მომავალს შორის, განაცხადა თბილისის მერობის კანდიდატმა გიორგი გახარიამ საარჩევნო უბანზე ხმის დაფიქსირების შემდეგ ჟურნალისტებთან.
გახარიას თქმით, დღევანდელი ხელისუფლება და ყოფილი ხელისუფლება საქართველოს ისევ წარსულში ექაჩება, რაც ქართველმა ხალხმა არ უნდა დაუშვას.
„ეს ორი ძალა, გარდა იმისა, რომ ერთმანეთს ასაზრდოებს, წარსულში გვექაჩება, ამიტომ დარწმუნებული ვარ, რომ თითოეული საქართველოს მოქალაქე გონიერ არჩევანს გააკეთებს მომავლისთვის. მინდა თითოეულ მოქალაქეს მოვუწოდო მივიდეთ არჩევნებზე, რადგან ეს არ არის მხოლოდ მუნიციპალური არჩევნები, ეს არის განახლების არჩევნები და ენ ყველამ ერთად ვიხილეთ, განსაკუთრებით ბოლო ერთი თვის განმავლობაში, რას ნიშნავს ქვეყანაში და სადამდე შეიძლება მიგვიყვანოს ერთპიროვნულმა მმართველობამ“, - განაცხადა გახარიამ.
2 ოქტომბრის არჩევნებზე ქვეყანაში გაიხსნა 3.664 საარჩევნო უბანი.
საკრებულოს არჩევნები შერეული სისტემით ტარდება. პროპორციული სისტემით დეპუტატებს პარტიებისთვის მიცემული ხმებით აირჩევენ, ხოლო მაჟორიტარებს - კანდიდატისთვის ხმის მიცემით.
არჩევნები ამომრჩევლის ნებისმიერი აქტივობის შემთხვევაში ჩაითვლება ჩატარებულად.