თბილისი, 2 ოქტომბერი - Sputnik. შინაგან საქმეთა სამინისტრომ მარნეულის მუნიციპალიტეტის სოფელ დაშტაფაში მდებარე N52-ე საარჩევნო უბანში მომხდარ დაპირისპირების ფაქტზე გამოძიება დაიწყო, ნათქვამია უწყების მიერ გავრცელებულ განცხადებაში.
უწყების ინფორმაციით, აღნიშნულ საარჩევნო უბანში ორ პირს შორის სიტყვიერი შელაპარაკება ფიზიკურ დაპირისპირებაში გადაიზარდა. დაპირისპირების დროს ერთ-ერთმა მათგანმა, რომელიც არაფხიზელ მდგომარეობაში იმყოფებოდა, მეორეს დანით მუცლის არეში დაზიანება მიაყენა.
შსს-ს ცნობით, ამ დროისთვის იდენტიფიცირებულია დაპირისპირებაში მონაწილე ყველა პირი, ჩატარებულია მოწმეთა გამოკითხვები.ასევე, ტარდება საპროცესო და საგამოძიებო ღონისძიებები, რის შემდეგაც აღნიშნული ქმედების ჩამდენ პირს ბრალდებულის სახით დააკავებენ.
მედიაში გავრცელებული ინფორმაციით, დაჭრილია პარტია „ლეიბორისტული პარტიის“ წევრი. გავრცელებული ინფორმაციით, იგი მარნეულის ერთ-ერთ კლინიკაშია გადაყვანილი.
ჯანმრთელობის განზრახ მძიმე დაზიანების ფაქტზე გამოძიება საქართველოს სსკ-ის 117-ე მუხლით გრძელდება.