თბილისი, 2 ოქტომბერი - Sputnik. ტყიბულის მუნიციპალიტეტის სოფელ ოჯოლის N24 საუბნო საარჩევნო კომისიის წევრმა არჩევნების მიმდინარეობისას საარჩევნო უბანი დროებით დატოვა, იუწყება ქართული მედია.
ტყიბულის საოლქო საარჩევნო კომისიაში აღნიშნული ფაქტი დაადასტურეს და აღნიშნეს, რომ კომისიის წევრს საარჩევნო უბნის დატოვების უფლება არ ჰქონდა. მათი ინფორმაციით, კომისიის წევრი არის სოფლად მცხოვრები მარტოხელა მამაკაცი, სახლში ძროხის დასაბმელად წავიდა და მალევე დაბრუნდა საარჩევნო კომისიაში.
დღეს საქართველოში თვითმმართველობის არჩევნები ჩატარდა. ქვეყნის მოსახლეობამ 64 მუნიციპალიტეტის საკრებულოს დეპუტატები და ამდენივე მერი აირჩია. საარჩევნო პროცესს აკვირდებოდა 31.310 დამკვირვებელი 100 ადგილობრივი ორგანიზაციიდან და 1.024 დამკვირვებელი 52 საერთაშორისო ორგანიზაციებიდან.