თბილისი 28 სექტემბერი — Sputnik. ავღანეთის დროებითი მთავრობა ქვეყნის ბოლო მეფის ზაჰირ შაჰის დროინდელ კონსტიტუციას გამოიყენებს, თუმცა გარკვეული გამონაკლისით, განაცხადა იუსტიციის მინისტრის მოვალეობის შემსრულებელმა აბდულ ჰაკიმ შარიამ.
როგორც დროებითი მთავრობის იუსტიციის სამინისტრო იუწყება, მინისტრის მოვალეობის შემსრულებელმა აბდულ ჰაკიმ შარიამ ავღანეთში ჩინეთის ელჩთან შეხვედრისას აღნიშნა, რომ ქვეყანა ისარგებლებს კონსტიტუციით, რომელიც ავღანეთის ბოლო მეფის დროს მოქმედებდა. გამონაკლისი იქნება ის დებულებები, რომლებიც შარიათს ეწინააღმდეგება.
მანამდე ავღანეთის დროებითი მთავრობის კულტურისა და ინფორმაციის მინისტრის მოადგილე ზაბიულა მუჯაჰიდმა РИА Новости-სთან ინტერვიუში აღნიშნა, რომ ხელისუფლებაში მოსული მოძრაობა „თალიბანი“ გეგმავს, მომავალ წელს კომისია ჩამოაყალიბოს ქვეყნის ახალი კონსტიტუციის შემუშავების მიზნით.