თბილისი, 23 სექტემბერი — Sputnik. ნიუ-იორკში გაეროს გენერალური ასამბლეის 76-ე სესიის ფარგლებში საქართველოს თავმჯდომარეობით დემოკრატიისა და ეკონომიკური განვითარების ორგანიზაცია სუამ-ის წევრი ქვეყნების საგარეო საქმეთა მინისტრების საბჭოს სხდომა გაიმართა.
სხდომის თავმჯდომარე საქართველოს ვიცე-პრემიერი, საგარეო საქმეთა მინისტრი დავით ზალკალიანი იყო. მასში მონაწილეობა მიიღეს აზერბაიჯანის საგარეო საქმეთა მინისტრმა ჯეიჰუნ ბაირამოვმა, მოლდოვის საგარეო საქმეთა და ევროპული ინტეგრაციის მინისტრმა ნიკუ პოპესკუმ, უკრაინის საგარეო საქმეთა მინისტრმა დმიტრო კულებამ და სუამ-ის გენერალურმა მდივანმა ალთაი ეფენდიევმა.
მინისტერიალზე მხარეებმა განიხილეს ორგანიზაციის დღის წესრიგში არსებული თანამშრომლობის ძირითადი საკითხები, მათ შორის პოლიტიკური, სექტორალური და საპარლამენტთაშორისო მიმართულებით.
მინისტერიალზე მხარეებმა ასევე ისაუბრეს და დადებითად შეაფასეს სუამ+ ფორმატის ფარგლებში თანამშრომლობა ორგანიზაციის პარტნიორ ქვეყნებთან და სხვა საერთაშორისო, მათ შორის, რეგიონულ ორგანიზაციებთან.
შეხვედრის ბოლოს მხარეებმა ხელი მოაწერეს სხდომის ოქმს და გადაწყვეტილებებს საორგანიზაციო საკითხების შესახებ.
სუამ-ი — დემოკრატიისა და ეკონომიკური განვითარებისკენ მიმართული ორგანიზაციაა. დაფუძნდა 1997 წელს საქართველოს, უკრაინის, აზერბაიჯანისა და მოლდოვის მიერ. ორგანიზაციის სახელწოდება მასში შემავალი ქვეყნების დასახელების პირველი ასოებიდან შედგება.