თბილისი, 23 სექტემბერი – Sputnik. გარდაბნის მუნიციპალიტეტის სოფელ მარტყოფში უცნობმა პირებმა იუსტიციის სახლის საზოგადოებრივი ცენტრის შენობაში განთავსებული ბანკომატის და სწრაფი ჩარიცხვის აპარატები ააფეთქეს, იუწყება ტელეკომპანია Rustavi 2.
შემთხვევა გუშინ, ღამის საათებში მოხდა.
გავრცელებული ინფორმაციით, აფეთქების შედეგად ჩაიმსხვრა მინები და მნიშვნელოვნად დაზიანდა საზოგადოებრივი ცენტრის შენობა. შემთხვევის შედეგად არავინ დაშავებულა.
ადგილზე ამ დრომდე ექსპერტ-კრიმინალისტები მუშაობენ. ჯერჯერობით უცნობია, შეძლეს თუ არა დამნაშავეებმა თანხის გატაცება.
მომხდარზე გამოძიება სსკ-ის 187-ე მუხლით დაიწყო, რაც სხვისი ნივთის დაზიანებას ან განადგურებას გულისხმობს.