თბილისი, 20 სექტემბერი – Sputnik. გადამფრენ მტაცებელ ფრინველებზე დასაკვირვებლად აჭარაში ათობით ორნითოლოგი და ეკოტურისტი შეიკრიბა, იუწყება აჭარის კურორტებისა და ტურიზმის დეპარტამენტი.
ფრინველებზე დაკვირვება ერთ-ერთი საინტერესო მიმართულებაა ეკოტურიზმში. აჭარას ამ სფეროში უზარმაზარი გამოცდილება აქვს. შავი ზღვის სანაპირო და კერძოდ ბათუმის შემოგარენი შავი ზღვის სამიგრაციო დერეფანია. ამ დერეფანში ყოველწლიურად ერთ მილიონზე მეტი გადამფრენი ფრინველი გადის. ამ მაჩვენებლით აჭარას მსოფლიოში მესამე ადგილი უკავია.
უწყების ცნობით, სპეციალისტები მთელი მსოფლიოდან ყოველწლიურად არეგისტრირებენ გადამფრენ ფრინველებს სადამკვირვებლო პლატფორმებიდან ჩაქვში – ჩაისუბანსა და სახალვაშოში.
გადამფრენ ფრინველებზე დაკვირვების ფესტივალი აჭარაში
© Department of Tourism and Resorts of Adjara
უწყების ხელმძღვანელის თინათინ ზოიძის განცხადებით, ამ მიმართულებით არაერთი მნიშვნელოვანი პროექტი განხორციელდა. მათ შორის, მომზადდნენ გიდები, მათთვის შეიძინეს აუცილებელი ინვენტარი. დეპარტამენტისთვის გადამფრენ ფრინველებზე დაკვირვების ტურიზმი ერთ-ერთი მნიშვნელოვანი მიმართულებაა, აღნიშნა ზოიძემ.
გადამფრენ ფრინველებზე დაკვირვების პერიოდი 15 აგვისტოდან 15 ოქტომბრამდე გრძელდება.
დაკვირვებისთვის მნიშვნელოვანი ადგილებია სახალვაშო, ჩაისუბანი, ჭოროხი, ბათუმის ზღვისპირა პარკი და პორტი.
გარდა ამისა, აჭარაში ყოველწლიურად ტარდება ფრინველებზე დაკვირვების საერთაშორისო ფესტივალი.