თბილისი, 14 სექტემბერი – Sputnik. ყალბი დოკუმენტების დამზადება–გამოყენებისა და სახელმწიფოს მოტყუებით დიდი ოდენობით ქონებრივი დაზიანების ფაქტზე ორ პირს ბრალი წარედგინა, ნათქვამია ფინანსთა სამინისტროს საგამოძიებო სამსახურის მიერ გავრცელებულ განცხადებაში.
გამოძიებით დადგინდა, რომ ბრალდებულებმა უკანონო მატერიალური სარგებლის მიღებისა და დღგ-ის ყალბი აქტივების შექმნის მიზნით მათი ფაქტობრივი მართვის ქვეშ მყოფი კომპანიების სახელით გაწერეს 3.428.000 ლარის ღირებულების ყალბი საგადასახადო ანგარიშ-ფაქტურები, რა გზითაც მათსავე კომპანიას შეუქმნეს ჯამში 522.915 ლარის ოდენობის ყალბი აქტივი.
გამოძიება სსკ-ის 185-ე მუხლის მესამე ნაწილით, 210-ე მუხლის პირველი ნაწილითა და 362-ე მუხლის მეორე ნაწილით მიმდინარეობს. დანაშაული ოთხიდან ექვს წლამდე ვადით თავისუფლების აღკვეთას ითვალისწინებს.