თბილისი, 2 სექტემბერი – Sputnik. სამხედრო მოსამსახურეების ბინებით უზრუნველყოფის პროცესი გრძელდება – 128 ოჯახი ახალმოსახლეობას გორში გადაიხდის, იუწყება საქართველოს თავდაცვის სამინისტრო.
საცხოვრებელი ფართების განაწილება კენჭისყრით მოხდა. ბინები თავდაცვის ძალების წარმომადგენლებს ე.წ. თეთრი კარკასის მდგომარეობაში გადაეცათ.
უწყების ინფორმაციით, საცხოვრებელ კორპუსებთან მოეწყო შშმ პირებისთვის ადაპტირებული პანდუსები, მიმდებარე ტერიტორია მოასფალტებული და კეთილმოწყობილია.
ახალმოსახლეობა სამხედრო მოსამსახურეებს საქართველოს თავდაცვის ძალების მეთაურმა, გენერალ-მაიორმა გიორგი მათიაშვილმა და თავდაცვის ძალების სხვა წარმომადგენლებმა მიულოცეს.
მანამდე, 31 აგვისტოს ვარკეთილის „ჯარის ქალაქში“ ბინები 485 სამხედრო მოსამსახურეს გადაეცა.
2013 წლიდან თავდაცვის სამინისტრომ ბინებით სამხედრო მოსამსახურეთა 2.047 ოჯახი დააკმაყოფილა.