თბილისი, 31 აგვისტო – Sputnik. ყაზბეგში მაშველებმა ყინულის ზვავში მოყოლილი ხუთი ტურისტი ამოიყვანეს, იუწყება ტელეკომპანია „რუსთავი 2“.
შემთხვევა დღეს, რამდენიმე საათის წინ მოხდა. მყინვარწვერზე ყინულის ფერდი იმ ადგილზე ჩამოიშალა, სადაც უცხოელი ტურისტები ოფიციალური ნებართვით გადაადგილდებოდნენ. შემთხვევის შედეგად მთამსვლელები ზვავმა მოიყოლა.
გავრცელებული ინფორმაციით, მაშველებმა ზვავიდან ორი ტურისტი უვნებლად ამოიყვანეს, სამი კი სხვადასხვა სახის მოტეხილობით ამ დროისათვის საავადმყოფოშია გადაყვანილი.
„ზვავი ზღვის დონიდან დაახლოებით 4.700 მეტრის სიმაღლეზე ჩამოწვა. იქ ხუთი ადამიანი იმყოფებოდა. მათგან სამი დაშავდა, რომლებიც საავადმყოფოში არიან გადაყვანილი“, – განაცხადა ყაზბეგის სამაშველო გუნდის წევრმა მარჩინ ბუენისკიმ.
დაშავებულები პოლონეთისა და უკრაინის მოქალაქეები არიან. ამ დროისთვის არცერთი მათგანის სიცოცხლეს საფრთხე არ ემუქრება.