თბილისი, 26 აგვისტო – Sputnik. პოლონეთში ძალოსანთა ევროპის ახალგაზრდულ ჩემპიონატზე ქართველი სპორტსმენები წარმატებულ ასპარეზობას განაგრძობენ.
დღეს ფიცარნაგზე 17 წლამდელთა შორის მოასპარეზე ქართველი ძალოსანი ნათია გადელია (81 კგ) გავიდა. ნათიამ ატაცში 87 კილოგრამი დააფიქსირა, რაც საუკეთესო შედეგი იყო. რაც შეეხება აკვრას, გადელიამ 117 კილოგრამის აწევა შეძლო და ორჭიდის ჯამში 204 კილოგრამით ის ევროპის ჩემპიონი გახდა.
ნათიამ მის უახლოეს მდევარს ემა პოღოსიანს (სომხეთი) ორჭიდში 8 კილოგრამით აჯობა, ხოლო ბრინჯაოს პრიზიორ თურქ ესმა ალპერს – 22 კილოგრამით.
აღსანიშნავია, რომ გუშინ 15 წლამდელთა შორის მოასპარეზე ქართველმა ძალოსანმა მარიამ მურღვლიანმა (81 კგ) ექვსიდან ექვსივე ცდა გამოიყენა და ევროპის ჩემპიონატზე ოქროს მედალი დაიმსახურა.
პოლონეთის ქალაქ ცეხანუვში 20 აგვისტოს დაწყებული ჭაბუკთა ევროპის ჩემპიონატის წინა დღეებში საქართველოს ნაკრების რამდენიმე ძალოსანმა იასპარეზა. ოქროს მედლები მოიპოვეს ასევე ლევან ოჩიგავამ (73 კგ) და გიგა ოდიკაძემ (49კგ). ამასთან, ბრინჯაოს მედალს დაეუფლა 81 კილოგრამ წონით კატეგორიაში მოასპარეზე საბა ადამია.
პოლონეთში ჭაბუკთა შორის ევროპის ჩემპიონატი 20 აგვისტოს დაიწყო და 27 აგვისტოს დასრულდება.