თბილისი, 26 აგვისტო – Sputnik. ქაბულის აეროპორტში ტერორისტული აქტის საფრთხე დღითი დღე იზრდება − რეალურად და არა თეორიულად, განაცხადა ნატოს გენერალურმა მდივანმა იენს სტოლტენბერგმა გაზეთ Financial Times-თან ინტერვიუში.
„ერთი მხრივ, ჩვენ გვსურდა გვქონოდა რაც შეიძლება მეტი დრო, რათა შეძლებისდაგვარად მეტი ადამიანი გამოგვეყვანა. მაგრამ... თუ ჩვენ 31 აგვისტოს შემდეგაც დავრჩებით, განსაკუთრებით, იმ შემთხვევაში, თუ თალიბები თუნდაც ჩუმი თანხმობის რაიმე მსგავსს არ მოგვცემენ, შეტევების საფრთხე იზრდება“, − მიაჩნია სტოლტენბერგს.
ალიანსის გენერალური მდივნის თქმით, ახლა ქაბულიდან ისტორიაში ერთ-ერთი ყველაზე მასშტაბური ევაკუაცია მიმდინარეობს. მისი თქმით, სამხედრო პროცესის დასრულების შემდეგ ნატო კვლავაც განაგრძობს ძალისხმევებს კომერციული რეისებით ევაკუაციისთვის და „თალიბანს“ სახმელეთო გზების გახსნას მოსთხოვს.
სტოლტენბერგმა დააზუსტა, რომ ევაკუაციისას ყველაზე რთული ადამიანების აეროპორტამდე მიყვანაა, ვინაიდან მიმდებარე ტერიტორიასაც და მთელ ქვეყანასაც თალიბები აკონტროლებენ.
აგვისტოს პირველ დეკადაში რადიკალურმა მოძრაობა „თალიბანმა“ ავღანეთის დიდ ქალაქებს შეუტია და 15 აგვისტოს დედაქალაქი ქაბული აიღო. 16 აგვისტოს მოძრაობის პოლიტოფისის წარმომადგენელმა მუჰამედ ნაიმმა განაცხადა, რომ ავღანეთში ომი დარულებულია და რომ ქვეყნის მმართველობის ფორმა უახლოეს ხანებში გახდება ცნობილი.
ერთადერთი ადგილი, რომელშიც თალიბებმა შესვლა ვერ მოახერხეს − პანჯშირის პროვინციაა. ამ დროისათვის ავღანეთიდან ყველა სახმელეთო გასასვლელს თალიბები აკონტროლებენ, ხოლო ქაბულის აეროპორტი ჯერჯერობით ამერიკელი და ნატოს წევრი სხვა სახელმწიფოების სამხედროების ხელშია. ამ აეროპორტიდან ხორციელდება უცხოელებისა თუ ქვეყნიდან წასვლის მსურველი ავღანელების ევაკუაცია. თალიბები აცხადებენ, რომ არ აპირებენ 31 აგვისტოს შემდეგაც გაუხანგრძლივონ ამერიკელებს ევაკუაციის ვადა.