თბილისი, 23 აგვისტო – Sputnik. საქართველოში გაყალბებული PCR-ტესტები და კოვიდ-პასპორტები დაფიქსირდა, მაგრამ აღნიშნულ საკითხთან დაკავშირებით ჯანდაცვის სამინისტროს კომპეტენტური პასუხის გაცემა არ შეუძლია, განაცხადა ჯანდაცვის მინისტრმა ეკატერინე ტიკარაძემ.
მინისტრის განმარტებით, დოკუმენტაციის გაყალბების ერთეული შემთხვევები ქვეყანაში ნამდვილად ფიქსირდება, მაგრამ მსგავს ფაქტებს შესაბამისი უწყებები იძიებენ.
„მსგავსი ფაქტების გამოძიებით დაკავებული არიან სხვა უწყებები, რომლებიც ჩვენ გვეხმარებიან ასეთი ფაქტების გამოვლენაში, შესაბამისად, აღნიშნულ ფაქტებზე რეაგირება მათ კომპეტენციაშია“, – განაცხადა ტიკარაძემ.
ამავე საკითხზე განცხადება გააკეთა ჯანდაცვის მინისტრის მოადგილემ თამარ გაბუნიამაც. მისი თქმით, პრობლემის გადასაჭრელად არსებობს მექანიზმი, რომლის მიხედვითაც ქვეყანაში შემოსული თითოეული ვიზიტორი 72 საათის შემდეგ ვალდებულია PCR-ტესტი საქართველოშიც ჩაიტაროს.
„ამ პრობლემის უფრო გრძელვადიანი და მყარი გადაწყვეტა ევროკავშირის ელექტრონულ სისტემასთან დაკავშირება იქნება. ამაზე მუშაობა მიმდინარეობს და ეს საკითხიც მალე გადაწყდება“, – განაცხადა თამარ გაბუნიამ.
5 ივლისიდან საქართველოში საჰაერო საზღვრის გადმოკვეთისას ვაქცინირებული პირები, ვაქცინაციის სრული კურსის დამადასტურებელ დოკუმენტთან ერთად, ვალდებული არიან თან იქონიონ ბოლო 72 საათის განმავლობაში გაკეთებული PCR-ტესტის უარყოფითი პასუხი.