თბილისი, 23 აგვისტო – Sputnik. დედაქალაქში კიდევ ერთი სავალე ჰოსპიტალი გაიხსნა კორონავირუსით დაავადებულებისთვის, ის ქავთარაძის ქუჩაზე მდებარეობს. ამის შესახებ ჟურნალისტებს საქართველოს ჯანდაცვის მინისტრმა ეკატერინე ტიკარაძემ განუცხადა.
ეს საველე ჰოსპიტალი დაახლოებით 200 პაციენტის მიღებას შეძლებს. ის აღჭურვილია ჟანგბადის აპარატებით. ჰოსპიტალმა პაციენტების მიღება 22 აგვისტოს დაიწყო.
ტიკარაძის თქმით, ჰოსპიტალურ სექტორში თავისუფალი საწოლები აღარ არის და განსაკუთრებით კრიტიკული მდგომარეობა ამ მხრივ თბილისშია.
„ჩვენ არ გვაქვს ჰოსპიტალურ სექტორში ადგილები და სწორედ აქედან გამომდინარე, ვცდილობთ ყველანაირი რესურსი გამოვიყენოთ, მათ შორის საველე ჰოსპიტლებიც. მსგავსი დაგეგმვა რეგიონულ ჭრილშიც მიმდინარეობს. ამ ეტაპზე აუცილებლად უნდა აღინიშნოს, რომ თბილისში არის განსაკუთრებით კრიტიკული მდგომარეობა“, – აღნიშნა ტიკარაძემ.
ამჟამად თბილისში საველე ჰოსპიტალი სამ ადგილზეა გახსნილი – დიღომში, სამგორში და ქავთარაძის ქუჩაზე. პირველი პაციენტები დიღმის ჰოსპიტალმა 18 აგვისტოს მიიღო და, ბოლო ინფორმაციით, იქ 90 ადამიანი მკურნალობს.