თბილისი, 18 აგვისტო – Sputnik. პოლიციამ თაღლითობის ბრალდებით 25 წლის მამაკაცი დააკავა, იუწყება შინაგან საქმეთა სამინისტრო.
გამოძიებით დადგინდა, რომ ახალგაზრდამ 2020 წლის დეკემბერში კანადაში მცხოვრები საქართველოს მოქალაქის სახელით სოციალურ ქსელ „ფეისბუქზე“ დაარეგისტრირა მომხმარებლის ყალბი პროფილი, რის შემდეგაც დაიმატა მეგობრები და მათგან ერთ-ერთს, რომელიც ამერიკის შეერთებულ შტატებში ცხოვრობს, მისწერა, თითქოს მის შვილს ჰქონდა ფინანსური პრობლემები, რის გამოც საქართველოში სასწრაფოდ უნდა გადაეგზავნა 300 აშშ დოლარი.
შეტყობინების მიმღებმა „ფეისბუქ“-მეგობარმა ჩათვალა, რომ რეალურად კომუნიკაცია ჰქონდა მის ნათესავთან, რის გამოც იმავე დღეს სწრაფი გზავნილების საერთაშორისო სისტემის მეშვეობით აშშ-დან საქართველოში ახალგაზრდა მამაკაცის სახელზე გამოგზავნა თანხა 300 დოლარის ოდენობით. ბრალდებულმა აღნიშნული თანხა გაანაღდა ერთ-ერთი კომერციული ბანკის ფილიალიდან, რითიც გამომგზავნს მიადგა ზიანი.
გამოძიება თაღლითობის ფაქტზე, რამაც მნიშვნელოვანი ზიანი გამოიწვია, საქართველოს სსკ-ის 180-ე მუხლის მე-2 ნაწილის „ბ“ ქვეპუნქტით მიმდინარეობს.
ბრალის დამტკიცების შემთხვევაში მამაკაცს 4-დან 7 წლამდე თავისუფლების აღკვეთა ემუქრება.